……Yayin da Gwamnatin Jihar Ogun Ta Yaba da Kokarin Kamfanin Wajen Taimaka wa Masu Bukata Ta Musamman
Fitaccen kamfanin kera siminti a Najeriya da Afirka, Dangote Cement Plc, ya sake jaddada kudirinsa na ci gaba da inganta rayuwar al’umma ta hanyar shirye-shiryen zuba jari a fannin jin dadin jama’a a cikin al’ummomin da yake aiki a fadin Najeriya da sauran sassan Afirka.
Shugaban kamfanin Dangote Cement Plc rashen Ibese, Mr. Ayyagari Subbaraidu, ne ya bayyana hakan lokacin da kamfanin ya karbi bakuncin tsofaffi da masu bukata ta musamman daga cikin al’ummomi 17 da ke kewaye da Kamfanin, a wani shiri da aka kira: “Ranar Tsoffin Jama’a”, wanda aka gudanar a harabar kamfanin da ke Ibese, Jihar Ogun.
Dangote Cement Ibese ya sake jaddada kudirinsa na ci gaba da tallafa wa ci gaban al’ummomin da ke kusa da inda yake gudanar da ayyukansa, yayin da Gwamnatin Jihar Ogun ta yaba da yadda kamfanin ke nuna kulawa da jin dadin al’umma.
Daraktan Kamfanin ya bayyana cewa wannan shiri na musamman an shirya shi ne domin inganta lafiyar jiki, zamantakewa da walwalar tsofaffi a cikin al’umma. Ya kara da cewa wannan shiri da ke cikin shekararsa ta uku yana magance wasu daga cikin matsalolin da tsofaffi ke fuskanta, kamar kadaici da rashin cudanya da jama’a, ta hanyar samar da yanayi mai dadi na hutu, zumunci da kuma duba lafiyar kyauta.
“Wannan taron shekara-shekara an shirya shi ne musamman domin inganta zamantakewa da walwalar tsoffinmu, tare da ba su damar duba lafiyarsu kyauta da kuma karbar kayan tallafi domin inganta rayuwarsu.” ya ce.
Ya kara da cewa duk da cewa tsufa wata ni’ima ce, da dama daga cikin tsofaffi na fuskantar kadaici da rashin cudanya da jama’a. Ya bayyana cewa wannan shiri na taimako yana zama wata dama ta samun hutu, zumunci da kuma duba lafiya kyauta.
