Daga Bashir Bello
A cikin jawabi mai cike da jinƙai da girmamawa wanda ya buɗe babin murna da tunawa, Mai Girma Jakada Dr. Malami Shehu Ma’aji (MFR), Shugaban Kwamitin Shawara na Hukumar Kare Haƙƙin Dan Adam ta Duniya (Nigeria) kuma Mai Ba da Shawara na Musamman kan Harkokin Afirka, ya yaba da ƙwazon CIS Aisha Shehu Nda bisa kyakkyawan aiki da sadaukarwa da ta yi wajen bautar ƙasa.
An gudanar da taron ritayar CIS Aisha a Otal ɗin Grand Central da ke Kano, inda taron ya ja hankalin al’ummar Najeriya daga sassa daban-daban daga manyan jami’an gwamnati, shugabannin gargajiya, wakilan ƙungiyoyin fararen hula, iyalai, abokai da abokan aiki na CIS Aisha. An cika dakin da yanayi na girmamawa, godiya da murna ga mace wadda aikinta ya bar tarihi a Hukumar Shige da Fice ta Najeriya.
A cikin jawabinsa, Jakada Ma’aji ya bayyana CIS Aisha a matsayin ginshiƙi na gaskiya, jajircewa da tausayi.
Ya ƙarfafa mata a faɗin Najeriya da su kwaikwayi halayenta na aiki tukuru, sadaukarwa da kishin ƙasa, yana mai cewa gagarumar gudunmawarta ta wuce iyakokin aikinta na hukuma
“CIS Aisha Shehu Nda ta nuna mana ma’anar yin hidima da zuciya da hangen nesa,” in ji Jakada Ma’aji.
“Gudunmawarta ga Hukumar Shige da Fice da kuma tallafa wa mata da matasa, shaida ce ta rayuwa mai cike da hidima ga ƙasa.”
A duk tsawon aikinta, CIS Aisha ta shahara ba kawai da ƙwarewar aiki ba, har da goyon baya ga mata da ƙarfafa matasa.
Ya Kara da cewa Jagorancinta a MAKIA Command ya kasance mai cike da kirkire-kirkire, da’a, da kuma kishin aiki.
Ta jagoranci shirye-shirye da suka inganta tsaron iyakoki, sauƙaƙa tsarin shige da fice, da kuma ƙarfafa al’adar ƙwarewa da ƙwararru a cikin hukumar.
Yayin da take bankwana da aikin gwamnati, abokan aiki da manyan baki sun karramata, inda suka bayyana halayenta na tawali’u, jarumtaka da sadaukarwa ga ci gaban ƙasa.
Da dama sun tuna rawar da ta taka a matsayin abin sha’awa da kuma abin koyi, musamman ga sabbin jami’ai Mata da maza da ke shigowa aikin gwamnati.
A cikin nata jawabin, CIS Aisha ta nuna godiya ga Hukumar Shige da Fice, iyalinta da duk masu goyon bayanta.
“Na cika da godiya da soyayya da aka nuna min,” in ji ta.
“Ritaya ba ƙarshen komai ba ne, sabuwar hanya ce. Ina fatan ci gaba da hidima ga kasata da alumma ta hanyoyi daban-daban.” Inji CIS Aisha
Yayin da aka rufe babin rayuwa mai ban mamaki, bikin ritayar CIS Aisha Shehu Nda ya zama tunatarwa mai ƙarfi kan yadda mutum ɗaya zai iya yin tasiri ta hanyar sadaukarwa, tausayi da kishin gaskiya.
Taron ya ƙunshi saƙonnin fatan alheri, gabatar da kyaututtuka da lambobin yabo don girmama tarihin CIS Aisha.
