Daga Bashir Bello, Abuja.
Kamfanin Taki na Dangote Fertiliser Limited ya lashe babbar lambar yabo ta kayan aikin noma a taron kasa na 17 na Noma da aka kammala a Keffi, Jihar Nasarawa.
Shugaban kwamitin amintattu na National Agricultural Foundation of Nigeria, Kabiru Ibrahim, ya bayyana cewa Dangote Group babban mai bayar da gudummawa ne wajen ci gaban ayyukan noma a Najeriya.
Malam Ibrahim ya ce, bayan samun nasara mai fice a fannin man fetur, Dangote Group na da cikakkiyar damar karkatar da jarin dabaru zuwa fannin noma domin inganta tsaron abinci na kasa.
Ya kara da cewa: “Jigon wannan shekarar na Karfafa Manoma Kanana: Farfado da daraja, tabbatar da inganci, zai tabbatar da cimma tsaron abinci a Najeriya” yana bayyana burinmu na hadin gwiwa wajen sake daidaita manoma kanana a matsayin ginshikin Najeriya wajen neman wadatar abinci.
Ya kara da cewa: “Dangote Group ya kasance abokinmu mafi girma tun daga fari kuma mun samu goyon baya mai yawa da ba zai iya misaltawa ba daga gare su, har ma da cewa, da ba don su ba, ba za mu iya ci gaba da gudanar da wannan taro yadda ya kamata ba.”
Aishatu Rufai, mai rikon mukamin coordineta na kasa na Gidauniyar Noma na Nigeria wato National Agricultural Foundation of Nigeria, ta yaba wa Dangote Fertiliser Limited bisa zuba jari mai yawa da goyon baya ga fannin noma, inda ta bayyana masana’antar Dangote na urea mai ton miliyan 3 a shekara a matsayin babban sauyi a wannan fanni.
A martaninta, Babbar Mai Ba da Shawara ga Shugaban Dangote Group, Hajiya Fatima Wali-Abdurrahman, ta ce: “Mun karfafa gwiwa da wannan yabo. Ya tabbatar da cewa aikinmu yana kawo tasiri na zahiri da auna a gonaki da rayuwar jama’a a fadin kasa. Mun sadaukar da wannan lambar yabo ga tawagarmu, abokan hulda, da manoma da ke ci gaba da amincewa da amfani da kayayyakinmu.”
Hajiya Wali-Abdurrahman ta kara da cewa kamfanin na zuba jari a binciken noma da kirkire-kirkire, tare da fadada damar samun taki mai saukin farashi, da kuma gina hadin gwiwa mai karfi da ke karfafa manoma da inganta tsaron abinci a kasarnan.
Shima Mai magana da yawun kamfanin, Anthony Chiejina, ya ce cikin wata sanarwa: “Mataki na gaba ya bayyana: fadada samarwa, kara yaduwa, da zama abokin dogon lokaci ga manoma da gwamnati wajen gina tattalin arzikin noma mai dorewa da inganci.
“Mun yi matukar godiya ga masu shirya taron kasa na Noma, kuma muna kara samun karfafa gwiwa don ci gaba da yin fiye da haka saboda makomar noma ta Najeriya ba ta cancanci kasa da haka ba.” A cewar shi.
Dangote Industries Limited na daga cikin masu daukar nauyin taron kasa na Noma na 2025.
Taron kasa na Noma na 2025 an shirya shi ne ta Gidauniyar Noma na Nigeria wato National Agricultural Foundation of Nigeria (NAFN) tare da hadin gwiwar Ma’aikatar Noma da Tsaron Abinci ta Tarayya da All Farmers Association of Nigeria (AFAN).
