By Bashir Bello, Abuaj
Gwamnan Jihar Kebbi, Nasir Idris, ya bukaci karin bayani daga hukumomin soji dangane da janye dakarun tsaro daga Makarantar Sakandaren ‘Yan Mata ta Gwamnati da ke Maga, jim kadan kafin a sace ‘yan makaranta mata a karamar hukumar Danko-Wasagu.
Gwamna Idris ya bayyana hakan ne a ranar yayin da yake karɓar jigo a ƙungiyar kwadago ta ƙasa (NLC), Joe Ajaero, wanda ya jagoranci ziyarar juyayin hadin kai zuwa jihar.
Gwamnan ya ce yana cikin damuwa matuka da yadda jami’an tsaro suka bar makarantar duk da rahotannin sirri da gwamnatin jihar ta bayar a baya.
A cewar Idris, sojoji sun bar makarantar da misalin ƙarfe 3 na dare, yayin da ‘yan bindigar suka kai hari kasa da mintuna 45 daga nan. “Mun bayar da rahotannin sirri. Mun sanar da su. To wa ya bayar da umarnin janye sojoji a irin wannan lokaci mai hatsari?” in ji Gwamna Idris, yana mai kira da a gudanar da cikakken bincike na soja kan lamarin.
Gwamnan ya kuma bayyana cewa janyewar sojojin ya saba da alkawarin da aka yi na ƙara tsaurara tsaro a makarantun da ke yankunan iyaka da ke fama da hare-haren ‘yan bindiga.
A nasa jawabin, Joe Ajaero ya nuna goyon baya ga jihar da iyalan daliban da aka sace, yana mai kira ga hukumomin tsaro na tarayya da su tabbatar da ceto yaran cikin koshin lafiya.
Sace ‘yan makarantar, wanda ya jawo fushi da damuwa a fadin kasar nan, na daga cikin jerin hare-haren da ake kaiwa makarantun yankin Arewa maso Yammacin Najeriya, lamarin da ke kara tayar da hankula a gida da waje.
