Daga Bashir Bello, Abuja
Gwamnan Jiha Kebbi, Comrade Nasir Idris, ya roki al’ummar jihar da su ci gaba da yin addu’o’i ganin yadda ’yan bindiga suka sake kai hari cikin jihar.
Gwamnan ya yi jajanta ga mutanen Karamar Hukumar Danko/Wasagu bisa hare-haren da aka kai a Wasagu da Maga, inda ’yan bindiga suka afkawa al’ummomin wuraren cikin dare.
A wani sanarwa da Abdullahi Idris Sadaukin Zuru, Mai Ba Gwamna Shawara kan Sadarwa da Tsare-tsare, ya fitar, an bayyana cewa ’yan bindiga sun kai hari a Wasagu, inda suka yi garkuwa da mutane da ba a tantance adadinsu ba. Haka kuma sun kutsa kai cikin Government Girls Secondary School, Maga, inda suka yi garkuwa da dalibai 25, suka kashe ma’aikaci ɗaya, tare da jikkata wani.
Sanarwar ta ce rundunar hadin gwiwa ta jami’an tsaro, tare da ƙarin jami’ai daga Abuja, na bin sawun ’yan bindigar da ake zargin sun shigo daga Jihar Zamfara.
Gwamna Idris ya nuna damuwa matuƙa kan yadda ’yan bindiga ke ketara daga jihohi makwabta da ma ƙasashe, suna kawo barna a kauyukan Jihar Kebbi.
Ya tabbatar da cewa gwamnatinsa za ta ci gaba da jajircewa wajen nemo maslaha mai ɗorewa ga matsalolin tsaro, gami da samar da kayan aiki da tallafin kuɗi ga jami’an tsaron da ke aiki a fadin jihar.
Comrade Gwamna Idris ya gudanar da tarurruka da manyan tarukan tsaro tare da manyan jigo-jigo a harkar tsaron kasa, ciki har da Sultan na Sokoto, Alhaji Muhammad Sa’ad Abubakar III, da tsofaffin Shugabannin Rundunar Sojin Kasa — Janar Christopher Musa da Laftanar Janar Abdulrahman Danbazau.
Haka kuma ya samar da tallafin kayan aiki ga jami’an tsaro, inda ya mika motoci 100 na Hilux da babura 5,000, domin taimakawa wajen kawo karshen wannan matsalar tsaro da ta addabi jihar.
