Daga Bashir Bello, Abuja
Gwamnan Jihar Katsina, Malam Dikko Umaru Radda, na daga cikin tawagar da ke rakiyar Mataimakin Shugaban Ƙasa, Kashim Shettima, zuwa Taron Kolin G20 na shekarar 2025 da ake gudanarwa a birnin Johannesburg, Afirka ta Kudu.
Hakkan Yana kunshe ne a wata Sanarwa dauke da sa hannun Ibrahim Kaula Mohammed, Sakataren Yaɗa Labarai na Gwamnan Jihar Katsina.
A cewar Sanarwan, taron wanda zai gudana daga ranar 22 zuwa 23 ga watan Nuwamba, shi ne karo na farko da ake gudanar da irin wannan babban taro na shugabannin ƙasashe masu ƙarfi tattalin arziki a nahiyar Afirka.
Taken taron na bana shi ne “Haɗin Kai, Daidaito, da Dorewar Ci gaba.”
Ibrahim Kaula yace Halartar Gwamna Radda a wannan taro na nuna jajircewar gwamnatin sa ta wajen mayar da Jihar Katsina cibiyar jawo hannun jari daga ƙasashen waje, musayar fasaha, da kuma ci gaban da zai dore.
Ana sa ran Gwamna Radda zai gana da shugabannin duniya, masu zuba jari na ƙasa da ƙasa, da abokan hulɗar ci gaba domin tattauna damar haɗin gwiwa a fannonin noma, makamashi mai sabuntawa, kirkire-kirkiren fasaha, da masana’antu.
Taron G20 na haɗa shugabanni daga manyan ƙasashen duniya waɗanda ke da kaso fiye da kashi 85 cikin 100 na GDP na duniya da kuma kashi biyu cikin uku na yawan al’ummar duniya.
Wannan taro na bana na G20 ya zama wata babbar dama ga nahiyar Afirka da Najeriya musamman, wajen bayyana muradun ci gaba da kuma ƙarfafa dangantaka da ƙasashen duniya.
