Daga Bashir Bello, Abuja
Gwamnan Jihar Osun, Ademola Adeleke, mataimakinsa Prince Kola Adewusi, da sauran mambobin majalisar zartarwa ta jihar sun shirya halartar bikin cika shekaru 40 da kafuwar makarantar KIDVARC Nursery, Primary da Sakandare School da ke Iree, Karamar Hukumar Boripe ta Jihar Osun.
Hukumomin makarantar KIDVARC Nursery, Primary da Sakandare, Iree sun bayyana cewa shirye-shiryen bikin cika shekaru 40 da kafuwar KIDVARC Nursery da Primary School da kuma shekaru 30 da KIDVARC High School sun yi nisa.
Ana kuma sa ran zuwan sarakunan gargajiya daga sassa daban-daban na ƙasa, masu ruwa da tsaki a fannin ilimi, daliban makarantar na yanzu da na baya, da tsofaffin daliban tsohuwar Kwalejin Ilimi ta Jihar Oyo, wadda yanzu ta koma Kwalejin Ilimi ta Jihar Osun da ke Ila-Orangun, inda marigayi Dr. Samuel Oyedokun Omotoso ya kasance Provost na farko.
Haka kuma, za a gudanar da bikin tunawa da marigayi Dr. Omotoso, wanda ya kafa makarantar, a matsayin cika shekaru 15 da rasuwarsa a lokacin bikin.
A cikin wata sanarwa da shugaban kwamitin yada labarai na bikin, Pastor Bamigbola Gbolagunte ya fitar, an bayyana cewa za a fara bikin ne a ranar Alhamis, 11 ga Disamba 2025 da taron manema labarai a dakin taro na Ojuolape, makarantar KIDVARC, Iree da karfe sha daya (11am) na safe.
Acewar Sanarwar “Za a kaddamar da ayyukan da aka kammala a makarantar a ranar Juma’a, 12 ga Disamba 2025, sannan za a ci gaba da taron cin abinci da haɗuwa da tsofaffin dalibai.”
Ta ƙara da cewa: “Za a gudanar da babban taron karshe na bikin a ranar Asabar, 13 ga Disamba 2025, inda za a ƙaddamar da littafi mai suna ‘50 Years of Talking and Chalking’ wanda marigayi Dr. S.O Omotoso ya rubuta, da kuma gabatar da laccar bikin a Leisure Spring Hotel, titin Iwo/Ibadan, Osogbo da karfe goma (10am) na safe.”
Sanarwar ta kuma bayyana cewa za a gudanar da bikin tunawa da marigayi Dr. Omotoso a wannan rana da kuma a wannan wuri, inda ake sa ran manyan baki za su halarta.
Marigayi Dr. Omotoso ya kasance Sakataren Gwamnatin Jihar Osun a lokacin gwamnatin farar hula ta farko karkashin marigayi Sanata Isiaka Adetunji Adeleke, kuma ya bayar da gudunmawa mai yawa wajen ci gaban jihar, musamman a fannin ilimi.
