Daga Bashir Bello, Abuja
A cikin wata gagarumar gaisuwa da ta cika da soyayya da girmamawa, Hon. Samaila Aliyu Makarfi, jigo a jam’iyyar African Democratic Congress (ADC), ya taya Mai Girma Rt. Hon. Aminu Waziri Tambuwal CFR (Matawallen Sokoto) murnar zagayowar ranar haihuwarsa, yana mai bayyana matukar yabo da godiya ga irin gudunmawar da tsohon Gwamnan Jihar Sakkwato kuma Sanata a Majalisar Dattawan Najeriya ya bayar ga ci gaban kasa.
“Barka da cika shekaru 60 ga Mai Girma Rt. Hon. Aminu Waziri Tambuwal CFR (Matawallen Sokoto). A wannan lokaci, rayuwarka ta kasance abar koyi ta fuskar sadaukarwa, jagoranci mai gaskiya, da kuma jajircewa wajen tabbatar da hadin kai da ci gaban Najeriya,” in ji Hon. Makarfi.
Ya yabawa tafiyar siyasar Sanata Tambuwal wadda ta shafe shekaru da dama tana cike da ayyukan alheri tun daga lokacin da ya kasance Kakakin Majalisar Wakilai har zuwa lokacin da ya zama Gwamnan Jihar Sakkwato, sannan yanzu yana ci gaba da taka rawa a matsayin Sanata mai daraja a Majalisar Dattawa.
“Tafiyarka ta kasance cike da jarumtaka, hangen nesa, da amana. Ka nuna cewa jagoranci ba wai mukami ba ne kawai, amma wani nauyi ne na hidima. Gudunmawarka wajen tabbatar da dimokuradiyya, hadin kan kasa, da karfafa al’umma ya kasance abin tunawa a zukatanmu,” Makarfi ya kara da cewa.
Yayin da kasa ke murnar wannan babban lokaci, Hon. Makarfi ya yi addu’ar samun karin hikima, lafiya, da karfin zuciya ga wannan dattijo mai kishin kasa. “Allah ya sanya wannan sabon babi na rayuwarka ya kasance na karin kuzari, cikar buri, da karin shekaru masu albarka na hidima ga Najeriya da daukacin bil’adama. Jamiyar ADC na taya ‘yan Najeriya miliyoyi murnar wannan rana tare da girmama wannan gwarzon kasa.”
Zagayowar ranar haihuwar Sanata Tambuwal inda ya cika Shekaru 60 ba wai kawai murnar kashin kai ba ce, amma dama ce ta kasa baki daya ta tunawa da dabi’un hadin kai, hidima, da jagoranci da yake wakilta. Yayin da wannan sabon zamani ke fara bayyana a rayuwarsa, kasa na sa ran ci gaba da gudunmawarsa ga tafiyar dimokuradiyya da gina Najeriya mafi alheri.
