Daga; BASHIR BELLO, Majalisa Abuja.
MAJALISAR Dattawa ta amince da gyare-gyare guda uku ga kudirin da ke neman sabunta Dokar Kafa Jami’ar Sojan Najeriya ta Biu.
Mai tallafawa kudirin, Sanata Muhammad Ali Ndume, ya bayyana cewa gyare-gyaren da aka gabatar sun haɗa da tanade-tanaden nadin shugabancin Jami’ar wato Chancellor da Pro-Chancellor.
Acewar sa, ya lura cewa dokar da ake amfani da ita a yanzu ba ta daidaita tsarin nadin waɗannan manyan mukamai na shugabanci daidai da ka’idojin da ake amfani da su a wasu jami’o’in tarayya ba.
Sanata Ndume ya ƙara da cewa Shugaba Bola Ahmed Tinubu ya riga ya amince da nadin Chancellor da Pro-Chancellor bisa ga shawarar Ministan Ilimi.
Ya ci gaba da cewa gyaran ya faɗaɗa kuma ya inganta tsarin Majalisar Gudanarwa don haɗawa da wakilan Babban Hafsan Sojoji, yana nuna sha’awar dabarun sojoji a jami’ar.
Gyare-gyaren sun kuma tabbatar da wakilcin manyan hukumomin ilimi, kare muradun masu ruwa da tsaki, da kuma tabbatar da halartar al’ummar da ke masaukin baki.
Wannan tsari yana tabbatar da cewa majalisar ta amfana daga ra’ayoyi daban-daban yayin da take kare wani aiki na musamman na cibiyar, Inganta Kula da Hakkin Bil Adama da Mulki.
Ya ƙara da cewa wannan gyaran yana ƙara haɓɓaka riƙon amana, gaskiya, haɗin gwiwa tsakanin sojoji da farar hula, da kuma gudanar da harkokin cibiyar cikin sauƙi.
Waɗannan gyare-gyaren suna da sauƙi, kuma suna da mahimmanci domin ba zasu canza halayen jami’ar ba, sai dai kawai suna ƙarfafa tushenta, fayyace tsarin gudanar da harkokinta, da kuma tabbatar da cewa ta ci gaba da yi wa rundunar sojin Najeriya da kuma ƙasa hidima yadda ya kamata.
