Daga Bashir Bello, Majalisa Abuja
Majalisar Dattawan Najeriya ta sake jaddada aniyarta na ƙarfafa tsarin kiwon lafiyar ƙasa, tare da mai da hankali kan yaki da cutar sickle cell da kuma faɗaɗa damar samun sabis na musamman na lafiya.
Da yake jawabi bayan zaman sauraron ra’ayoyi kan muhimman dokoki guda biyar da suka shafi lafiya, Sanata Garba Maidoki (Kebbi ta Kudu) ya jaddada cewa Majalisar Dattawa za ta ci gaba da tattaunawa kan dokokin da za su inganta isar da ayyukan lafiya a fadin ƙasa.
Daya daga cikin muhimman dokokin da aka tattauna ita ce Dokar Kafa Cibiyoyin Bincike da Magani na Ciwon Sankaran Jini (Sickle Cell) (2025) wadda Sanata Marshal Katung ya dauki nauyi. Dokar ta fara da shirin kafa cibiyoyi guda shida daya a kowace yankin siyasa.
Sai dai Sanata Maidoki ya nemi a ninka adadin zuwa 12, yana mai cewa tuni akwai cibiyoyi guda shida da ke aiki, kuma an tanada su da kayan aiki da ma’aikata.
“Muna ganin cewa cibiyoyi 12 don maganin sickle cell ba su isa ba ga ƙasa kamar Najeriya, amma wannan mataki ne na farko,” in ji Maidoki.
“Burinmu shi ne rage nauyin da cutar sickle cell ke dora wa al’umma a Najeriya.”
Kan batun kuɗi, Maidoki ya bayyana cewa gwamnati na tallafa wa cibiyoyi guda shida da ke aiki a yanzu. Ana nazarin yadda za a samu kuɗin kafa ƙarin guda shida. Ya kuma jaddada cewa kwamitin lafiya na Majalisar Dattawa ya gabatar da shawarwarin ƙara kaso daga 1% zuwa 2% a kasafin kuɗin lafiya, yana mai cewa “mataki ne mai kyau a hanya madaidaiciya.”
Sanata Katung ya bada wani labari na rayuwa da ya tinzira shi wajen daukar nauyin dokar. Ya tuna yadda ya ziyarci wata iyali fiye da shekaru ashirin da suka wuce, inda wani yaro mai fama da ciwon sickle cell, wanda rashin kudi yasa ba zai iya zuwa asibiti ba, ya roki iyayensa su bar shi ya mutu don su samu hutu.
“Wannan lamari ya daure min kai,” in ji Katung. “Bai kamata wani yaro ya ji haka ba.”
Mataimakin Shugaban Kwamitin Lafiya na Majalisar Dattawa, Sanata Samaila Dahuwa, ya tabbatar da cewa kwamitin zai duba shawarwarin da Ma’aikatar Lafiya ta Tarayya da sauran masu ruwa da tsaki suka gabatar, don tabbatar da cewa cibiyoyin da aka gabatar za su magance gibin da ke cikin tsarin lafiya na ƙasa.
“Muna da ƙarancin cibiyoyin lafiya da ma’aikatan lafiya don kula da sama da mutane miliyan 200 a Najeriya,” in ji Dahuwa.
“Shi ya sa ‘yan majalisa ke ƙoƙarin samar da ingantaccen tsarin lafiya ga al’ummarsu.”
Zaman sauraron ra’ayoyin ya kuma shafi dokoki guda hudu da suka haɗa da:
Dokar Gyaran Dokar Lafiya ta Ƙasa daga Sanata Ipalibo Banigo sai Dokar Kafa Asibitin Orthopaedic na Tarayya a Dekina, Jihar Kogi daga Sanata Isah Jibrin
Akwai Dokar Kafa Cibiyar Idanu ta Ƙasa a Gboko, Jihar Benue wanda Sanata Zam Titus Tertenger ya dauki nauyi sai kuma Dokar Kafa Cibiyar Idanu ta Ƙasa a Pushit-Mangu, Jihar Plateau daga Sanata Plang Diket
Ana sa ran kwamitin zai gabatar da rahotonsa ga zaman Majalisar Dattawa don amincewa.
