Daga Bashir Bello, Abuja
Rukunin Kamfanonin Dangote ya bayyana cewa yana aiki tare da abokan hulɗa domin farfaɗo da ƙarfafa ɓangaren noma don bunkasa tattalin arziƙin Najeriya.
Wannan ci gaba na zuwa ne yayin da kamfanin ke ɗaukar nauyin bikin Noman Ƙasa na 17, wanda za a fara ranar Talata, 25 ga Nuwamba, 2025, a Keffi, Jihar Nasarawa.
Mai magana da yawun kamfanin, Anthony Chiejina, ya bayyana cewa faɗaɗa amfani da na’urorin zamani a harkar noma zai taka muhimmiyar rawa wajen haɓaka jimilar kimar tattalin arzikin kasa GDP na Najeriya da kuma samar da ayyukan yi masu ma’ana ga matasa masu yawa a ƙasar.
Ya ce: “Ta wannan haɗin gwiwa, kamfanin nada burin ƙarfafa shiga harkar noma ta kasuwanci da kuma ƙara taka rawa wajen bunƙasa tattalin arziƙin Najeriya.”
Ya ƙara da cewa taken bikin bana, Ɗaukar Manoman Ƙanana, Mayar da Kima, Tabbatar da Ƙarfin Samar da Amfani” ya dace da bukatun ƙasar, wajen cimma isasshen abinci.
“Mayar da kimar noma ba wai kawai yana da alaƙa da tarihi ba ne, har ila yau yana ba da wata hanya ta ainihi wajen farfaɗo da tattalin arziƙi. Tare da kyawawan ƙarfafa gwiwa da amfani da hanyoyin zamani, noma zai iya sake zama ginshiƙin bunƙasar tattalin arziƙi, yana samar da ayyuka, daidaita kasuwanni, da kuma ƙarfafa tushen tattalin arziƙin ƙasa.” Inji Mr. Chiejini
Bikin Noman Ƙasa, wanda ya zama wani ɓangare na kalanda na harkar noma a Najeriya, na ba da dama don nuna sabbin fasahohi a cikin dukkan sassan harkar noma.
Sanarwar ta bayyana cewa kamfanin yana gina matatun shinkafa a jihohin Kano, Jigawa, Neja, Kebbi da Sakkwato, tare da ƙarfin sarrafa tan miliyan 1.5 a kowace shekara.
An bayyana cewa wannan ƙoƙari na da nufin tallafa wa shirin gwamnati na tabbatar da isasshen abinci a ƙasa.
Sanarwar ta ambato Babbar Mashawarcin Shugaban Kamfanin Dangote, Hajiya Fatima Wali-Abdurrahman, tana cewa bisa ga kudirin kamfanin na mayar da kimar masana’antar haɗin gwiwar noma a Najeriya, yana zuba jari sosai a cikin ayyukan haɗa kai a ɓangaren suga a jihohin Nasarawa da Adamawa.
Ta ce, a matsayin gudunmawar kamfanin ga ɓangaren noma, yana da wata babbar masana’antar takin zamani a Legas, da ke cikin Yankin Kasuwanci na Kyauta na Lekki, wadda ke da ƙarfin samar da tan miliyan 3 na urea a kowace shekara.
Da yake magana kan shiga cikin bikin, Shugaban Kwamitin Amintattu na Gidauniyar Noma ta Ƙasa (BoT), wanda ke shirya bikin Noman Ƙasa na shekara-shekara, Arc Kabiru Adamu, ya ce: “Rukunin Kamfanonin Dangote shi ne babban abokin haɗin gwiwarmu tun farko, kuma mun samu goyon baya mai yawa da ba za a misalta ba daga gare su, wanda da babu su da ba za mu iya ci gaba da gudanar da wannan biki yadda ya kamata ba.”
Arc Adamu, wanda kuma shi ne Shugaban Ƙungiyar Manoma ta Ƙasa (AFAN), ya bukaci Rukunin Dangote da su mai da hankali kan harkar noma bayan nasarorin da suka samu a ɓangaren mai da iskar gas.
Ya ƙara da cewa: “A bana muna sa ran fitowar masu ƙera injinan noma, masu sarrafa amfanin gona, masu bincike, matasa da mata manoma da za su amsa kiran ƙarfafa tsarin abinci na Najeriya.”
