Daga Bashir Bello, Kaduna
Hukumar Inshorar Ajiya ta Najeriya (NDIC) ta sake jaddada kudirinta na kare ajiyar yan Najeriya, inda ta tabbatar da cewa kashi chasa’in da ta, (99%) cikin dari (100%) na masu ajiya a bankuna yanzu suna da cikakken kariya karkashin tsarin inshorar ajiya da aka fadada.
Manajan Darakta kuma Kwamishinan Hukumar, Mista Thompson Oludare Sunday, ya bayar da wannan tabbaci a lokacin Ranar Musamman ta Hukumar a bikin baje kolin kasa da kasa na Kaduna karo na 47.
Yayin da yake jawabi a kan taken “Daga Sauye-sauye zuwa Sakamako: Sauyin Tattalin Arziki ta hanyar Ci gaban Abubuwan Cikin Gida da Dorewa,” ya jaddada rawar NDIC wajen karfafa amincewar jama’a da tsarin banki.
Dr. Regina Timlong, Mataimakiyar Darakta na Sashen Hulda da Jama’a, ita ce ta wakilci Shugaban Hukumar inda Sunday ya bayyana cewa a shekarar 2024, Hukumar ta kara mafi girman inshorar ajiya zuwa Naira miliyan Biyar 5 ga masu ajiya a Deposit Money Banks, Mobile Money Operators da Non-Interest Banks. Masu ajiya a Payment Service Banks, Microfinance Banks da Primary Mortgage Banks kuma suna da kariya har zuwa Naira miliyan Biyu 2.
Ya ce wannan kariya da aka fadada ta tabbatar da cewa kusan kashi chasa’in 99 cikin dari 100 na masu ajiya suna da cikakken kariya, musamman wadanda suka fi rauni.
“A duk lokacin da banki ya karye, masu ajiya da aka inshora za a biya su cikin gaggawa har zuwa iyakar da aka tabbatar, yayin da wadanda ke da kudade sama da wannan iyaka za su karɓi rabo daga kadarorin bankin da aka rufe,” in ji shi.
Sunday ya kawo misalin biyan kudade cikin gaggawa ga masu ajiya na tsohon Heritage Bank Limited, Union Homes Plc da Aso Savings and Loans Plc a matsayin shaida na ingantattun hanyoyin NDIC.
“Ta hanyar amfani da Bank Verification Number (BVN), Hukumar ta gano asusun na masu ajiya kuma ta tura kudaden inshora cikin yan kwanaki bayan rufewar bankuna,” in ji shi.
Ya shawarci masu ajiya da su tabbatar da cewa BVN dinsu ya dace da asusun bankinsu domin samun saukin karɓar kudaden inshora idan banki ya karye.
Ya kara da cewa NDIC tana aiki tare da Babban Bankin Najeriya (CBN) ta hanyar kulawa bisa hadarin bankuna da tsare-tsaren warware matsaloli domin rage tangarda ga tsarin kudi.
Sunday ya yaba wa Kaduna Chamber of Commerce, Industry, Mines and Agriculture bisa ci gaba da gudanar da baje kolin a matsayin dandalin kirkire-kirkire da wayar da kan jama’a kan harkokin kudi.
Ya kuma jaddada kudirin NDIC na zama mai saurin amsawa da dogaro da fasaha wajen kare masu ajiya, hana bankuna karyewa, karfafa daidaiton kudi da kuma bayar da gudummawa ga dorewar tattalin arzikin Najeriya.
