Daga Bashir Bello, Majalisa Abuja
Tsohon Mataimakin Kakakin Majalisar Wakilai, Ahmed Idris Wase, ya gargadi ‘yan Najeriya da su daina danganta matsalolin tsaro da ke addabar kasar da addini, yana mai jaddada cewa wannan rikici na da nasaba da ta’addanci ne kawai, ba addini ba.
Wase ya bayyana hakan ne yayin zaman majalisar wakilai a wani zama na musamman da aka gudanar a Abuja domin tattauna matsalolin tsaro da ke kara ta’azzara a fadin kasar.
Dan majalisar ya bayyana cewa kusan rabin matsalolin tsaro da ake fuskanta a yankin Yammacin Afirka na faruwa ne a Najeriya, inda yankin Arewa ta Tsakiya ke fama da mafi yawan matsalolin.
A wata hira da ya yi da manema labarai na majalisar bayan zaman, Wase ya nuna damuwarsa kan yadda rahoton sirri da aka samu bai samu kulawa daga sojoji ba kafin sace daliban jihar Kebbi. Ya tambayi dalilin da yasa aka janye sojojin da ke gadin makarantar awa daya kafin harin.
“Waye ya bayar da umarnin janye sojoji daga makarantar kafin harin? Wadannan tambayoyi ne da ya kamata a amsa,” in ji Wase.
Wase wanda jigo ne a majalisar ya kara da cewa rahotanni sun nuna cewa wasu jami’an tsaro na hada kai da ‘yan ta’adda, lamarin da ya bayyana a matsayin barazana ga yaki da ta’addanci.
Ya kuma kawo wani misali na tsohon sakataren gwamnatin tarayya da ya gano wani sanannen barawo sanye da kayan jami’in tsaro a filin jirgi, inda ya bayar da umarnin a kama shi.
“Wannan na daga cikin matsalolin da muke fuskanta. Idan ka samu barawo a cikin tsarin tsaro, to lallai matsalar ba za ta warware ba sai anyi da gaske” in ji shi.
Daga bisani yayi Kira gave Yan Najeriya Dasu kaunaci juna kuma su ba jamian Tsaro Bayyanan sirri domin magance Matsalar, ya kuma gargadi jamian Tsaro Dasu ji Tsoron Allah suyi aikin da yakamata domin dakile wannan kalubalen.
