Daga Bashir Bello Majalisa Abuja
Yayin da Majalisar Wakilai ke ci gaba da gyara Dokar Yan Sanda ta Najeriya, Kwamitinta kan Harkokin Yan Sanda ya bayyana goyon bayansa ga shigar mata a kalla kashi 15 cikin 100 a duk wani daukar ma’aikata, da kuma gyara manufofin da suka shafi jinsi a fannin.
Shugaban kwamitin, Hon. Makki Abubakar Yalleman, a wani zaman jin ra’ayi da aka gudanar a Abuja ranar Litinin, ya ce mata na taka muhimmiyar rawa wajen inganta aikin’ yan sanda, don haka ba za a ci gaba da watsi da su ba.
Muhimman abubuwan da ke cikin kudirin sun hada da bukatar tilasta wa rundunar’ yan sanda aiwatar da shirin da ya dace da jinsi, wanda zai shafi daukar aiki, horo, tura aiki, ladabtarwa, da la’akari da aure, tare da kafa wani sashe na musamman da zai sa ido kan aiwatar da shirin.
“Wannan kudiri na da nufin kara yawan mata da ake dauka aikin yan sanda da a kalla kashi 15 cikin 100, tare da samar da yanayi mai dacewa da su don su samu ci gaba.” Inji Yalleman.
Ya kara da cewa wannan mataki ya yi daidai da ajandar dokoki ta Majalisa ta goma karkashin Shugabancin Dr. Tajudeen Abbas.
Da yake zantawa da manema labarai Cikin harshen Hausa Jim kadan bayan zaman Kwamitinsa Hon. Yalleman ya Kara da cewa an baiwa kowa Ikon gabatar da ba’asi da kuma raayoyinsu Akan wannan batun.
“Suma Masu bukatu na musamman (kaman guragu) zaa basu Damar taka rawar da zasu iya, kun San ana iya Amfani Dasu Wurin Samun bayanan sirri” Hon. Yalleman yace
Ma’aikatar Harkokin’ Yan Sanda ta Tarayya ma ta bayyana cikakken goyon bayanta ga gyaran dokar, inda wakilinta, Okorie Kalu daga sashen shari’a, ya bayyana wannan kudiri da cewa
“abin yabo ne kuma tuni ya kamata ace anyi,”
Yana mai cewa sun riga sun fara tsara dokoki da za su kawar da ka’idojin daukar aiki da ke nuna bambanci, ciki har da takurawa da ke da alaka da ciki da aure.
A jawabinsa, Shugaban Majalisar Dr. Abbas, wanda ya bude taron, ya ce kara yawan mata a rundunar yan sanda ba kawai batun jinsi ba ne, har ma da batun adalci, daidaito, da inganta aikin yan sanda.
Ya kara da cewa rundunar ta dade tana aiki da yawan mata da bai kai kima ba, musamman a mukaman shugabanci.
