Kamfanin Dangote Cement Plc, ta hannun katafaren offishin Obajana, ta kaddamar da sansanonin tsaro guda biyu a al’ummomin Iwaa da Apata.
Yayin da yake jawabi a wajen bikin kaddamarwar, Daraktan Masana’antar Obajana na Dangote Cement Plc, Azad Nawabuddin, ya bayyana cewa an aiwatar da ayyukan ne a matsayin wani bangare na jajircewar kamfanin wajen ci gaban al’umma da karfafa tsaro a cikin al’ummomin da ke karɓar bakin Kamfanin, ya ce ko da yake Iwaa tana da nisa da Kamfanin, al’ummar na da matsayi na musamman a cikin abubuwan da kamfanin ke bai wa muhimmanci, yana mai cewa kamfanin yana da cikakken shiri wajen tabbatar da cewa ayyukan ci gaba da tsaro sun wuce al’ummomin da ke kusa da ita.
Azad Nawabuddin ya jaddada cewa tsaro na da matukar muhimmanci wajen ci gaba da dorewar cigaban al’umma, yana mai cewa “al’umma da ba ta da tsaro ba za ta iya samun ci gaba mai ma’ana ba.”
Ya kara da cewa sabbin gine-ginen tsaro da aka kaddamar sun zama wani muhimmin mataki wajen kare rayuka da dukiyoyi, tare da karfafa dangantaka tsakanin al’ummomin da Dangote Cement Plc wajen gudanar da tsarin tsaro.
Yayin da yake jawabi a wajen taron, Olu na Apata, Oba Fredrick Balogun, ya nuna godiya ga kamfanin bisa samar da abin da ya kira gine-gine masu kayatarwa da sauran abubuwan more rayuwa ga al’ummar Apata, yana mai cewa an saka al’ummar cikin jerin wadanda ke amfana da tallafin tsaro daga Dangote.
Hakazalika, Ya bayyana Alhaji Aliko Dangote a matsayin Wanda keda zuciya mai kyau kuma wanda Allah ya aiko wa mutanensa.
A nasa jawabin, Elesho na Iwaa, Mai Martaba Obafemi Abel Alade Alaofin, ya nuna godiya bisa abin da ya kira “nuna soyayya” daga Dangote Cement Plc.
Sarkin ya ce, al’ummarsa na matukar godiya da sabuwar cibiyar tsaro, yana mai alkawarin cikakken goyon baya ga kamfanin.
Ya ce Iwaa ta samu dimbin fa’ida daga Dangote Cement Obajana, yana mai cewa dangantakar da ke tsakanin su tana da kyau kuma suna amfanar juna.
Babban Manaja na Sashen Ayyukan Zamantakewa, Prince Adeyemi Ademola, ya ce binciken bukatu da aka gudanar a shekarar 2024 ya nuna cewa gine-ginen tsaro na daga cikin abubuwan da suka fi muhimmanci a al’ummomin Apata da Iwaa.
Prince Ademola ya ce a matsayin kamfani mai daukar nauyin zamantakewa, Dangote Cement Plc ta fara da kuma kammala ayyukan sansanonin tsaro don cika wannan bukata ta al’umma.
Ya sake jaddada jajircewar kamfanin wajen ci gaban al’umma mai dorewa ta hanyar ci gaba da tattaunawa da kuma aiwatar da ayyuka bisa fifiko.
Comrade Rotimi Kekereowo, Shugaban Matasa daga al’ummar Iwaa, ya nuna godiya ga kamfanin tare da kira da a ci gaba da hadin gwiwa don ci gaban al’umma.
A nasa bangaren, Sakataren al’ummar Apata, Comrade Adekunle Babatunde, ya gode wa Daraktan Shukar bisa daukar lokaci daga cikin jadawalin aikinsa don kaddamar da kuma mika sansanin tsaro, yana mai alkawarin cewa al’ummar za ta yi amfani da shi yadda ya kamata.
