-
…FIRS Ta Karrama Kamfanin Siminti Karo Na Biyu
By Bashir Bello, Abuja
A karo na biyu a jere, babban kamfanin siminti na Afrika, Dangote Cement Plc, ya samu karramawa a matsayin kamfani mafi bin ka’idojin biyan haraji a Najeriya a shekarar 2025 daga Hukumar Tara Haraji ta Tarayya (FIRS).
An ba Dangote Cement wannan lambar yabo a lokacin bikin Ranar Musamman ta FIRS da aka gudanar a bikin Kasuwanci na Duniya na 2025 a Lagos, wanda aka yi a Tafawa Balewa Square.
Yayin da FIRS ke karrama kamfanin a rukuni na manyan masu biyan haraji, ta bayyana cewa Dangote Cement ya samu wannan yabo ne sakamakon bin ka’idoji da tsari mai tsauri da FIRS ta gudanar tare da hadin gwiwar masu kula da haraji a sassa daban-daban na kasar.
Yayin karbar lambar yabo, Shugabar Sashen Haraji da Bin Ka’ida na Dangote Cement Group, Mojisola Ogunlade, wadda ta jagoranci tawagar Dangote Group, ta ce wannan yabo yana kara tabbatar da jajircewar kamfanin wajen gaskiya, rikon amana, da bin ka’idojin haraji cikin lokaci.
Ta gode wa FIRS bisa wannan karramawa, tana mai cewa lambar yabo tana nuna kudurin kamfanin na tallafa wa ci gaban Najeriya ta hanyar bin haraji yadda ya kamata.
Ogunlade ta bayyana cewa, “Wannan karramawa shaida ce ta jajircewarmu wajen cika dukkan wajibai na bin ka’ida da kuma bayar da gudunmawa ga ci gaban kasa.” Ta kara da cewa, “Za mu ci gaba da karfafa hadin gwiwarmu da FIRS da kuma bin ka’idojin da ke tallafa wa tsarin haraji mai gaskiya da inganci.”
A cewarta, karramawar da FIRS ta yi wa kamfanoni da ke bayar da gudunmawa ga kudaden shiga na kasa ta hanyar bin haraji yadda ya kamata, wata hadin gwiwa ce da za ta kara karfafa kishin kasa da bin doka a tsakanin kamfanoni masu zaman kansu, da kuma zaburar da sauran kamfanoni su yi koyi.
Ta bayyana cewa Dangote Industries Limited (DIL) ya cika tsammanin jama’a, don haka kamfanonin da ke karkashinsa ba za su yi kasa a gwiwa ba. Ta tuna cewa Dangote Group ya biya haraji sama da Naira biliyan 402 a shekarar 2024, wanda ya sa ya zama mafi girman mai biyan haraji a kasarnan.
Yayin da take bayani kan dalilin karramawar, Shugabar Sashen Haraji ta Dangote ta ce Dangote Group ya samu cikakken bin ka’idoji ta hanyar aiwatar da tsare-tsaren zamani da suka dace da dokokin haraji.
“Wadannan matakai suna jaddada bin lokaci da doka, tare da rage kudaden da ke tattare da rashin bin ka’ida.”
“Alamar Dangote koyaushe tana da niyyar inganta al’adar bin haraji. Wannan yana nuna nauyin da ke kanmu na tallafa wa kokarin gwamnati wajen samar da muhimman kayayyakin more rayuwa ga’yan kasa.”
“Ga Dangote Cement, wannan karramawa wata zabura ce ta ci gaba da jagoranci a fannin shugabanci da bayar da gudunmawa ga ci gaban tattalin arzikin Najeriya,” in ji Ogunlade.
Tun da farko, a jawabin ta, Daraktar Sashen Hidima ga Masu Biyan Haraji na FIRS, Dr. Lovette Onanuga, ta jaddada muhimmancin bikin karramawar bana, tana mai cewa an shirya shi ne don girmama kamfanonin da ke da daidaito da hadin kai wajen cika burin samun kudaden shiga na kasa.
Ta bayyana cewa FIRS ta dogara da shawarwarin masu kula da haraji wajen gano kamfanonin da suka fi fice, inda ta kara da cewa bin doka, cika lokaci, da kwarewa sune muhimman ka’idoji.
A cewarta, “Hadin gwiwarku a matsayin masu biyan haraji na da matukar muhimmanci wajen taimaka wa hukumar FIRS ta cika aikinta a matsayin hukumar gwamnati da ke da alhakin tara haraji da tura shi. Wannan ne ya sa muka ga dacewar karrama ku ta wannan hanya ta musamman.”
