Daga Bashir Bello
Kamfanin Man Fetur na Ƙasa (NNPC Limited) ya bayyana samun riba bayan haraji (PAT) da ta kai Naira tiriliyan 5.4 a shekarar ta 2024, wanda ke nuna ƙaruwa da kashi 64% idan aka kwatanta da shekarar da ta gabata.
Kamfanin ya kuma bayyana samun kudaden shiga da suka kai Naira tiriliyan 45.1, wanda ke nuna ƙaruwa da kashi 88% daga shekarar da ta gabata.
Wannan sakamakon na kuɗi, wanda aka bayyana a yayin taron bayani da masu nazari, ya nuna cewa kamfanin ya samu nasarar gudanar da ayyukansa cikin ƙwarewa da kuma ƙarfafa juriya a fannin kuɗi.
A cikin wata sanarwa, Babban Shugaban Kamfani, Bashir Bayo Ojulari, ya danganta wannan nasara da sauye-sauyen da kamfanin ke ci gaba da yi da kuma sadaukarwar ma’aikatansa.
“Wannan riba ta nuna ci gaba mai ƙarfi daga sauye-sauyen da muke yi da kuma jajircewar ma’aikatanmu,” in ji Ojulari.
“NNPCL ta samar da ginshiƙi mai ƙarfi don ci gaba da haɓaka, daidai da umarnin Shugaba Bola Ahmed Tinubu, tare da tabbatar da aniyar mu na kawo fa’ida ga yan Najeriya.”
Bayan nasarar shekarar 2024, NNPC Ltd ta ƙaddamar da wani shiri na dogon lokaci domin ci gaba da haɓaka da kuma tallafa wa sauyin makamashi a Najeriya har zuwa shekarar 2030.
A tsakiyar wannan shiri akwai zuba jari na dala biliyan 60 da zai shafi dukkanin sassan harkar makamashi daga bincike da hakar mai, zuwa tacewa da rarrabawa.
A cewar Sanarwan, Muhimman manufofi a cikin wannan shiri sun haɗa da, Ƙara yawan hakar danyen mai zuwa ganga miliyan 2 a rana, nan da Shekara 2027, da ganga miliyan 3 a rana nan da 2030.
Sai kuma, Ƙara yawan samar da iskar gas zuwa biliyan 10 cubic feet a rana nan da 2027, da biliyan 12 cubic feet a rana, nan da Shekara 2030.
Har ila yau, akwai batun Kammala manyan ayyukan bututun gas kamar su Ajaokuta-Kaduna-Kano (AKK), Escravos-Lagos Pipeline System (ELPS), da Obiafu-Obrikom-Oben (OB3) domin ƙarfafa samarwa a gida da haɗin gwiwa da ƙasashen yankin.
Ojulari ya jaddada cewa sauye-sauyen da kamfanin ke yi sun ta’allaka ne da gaskiya, kirkire-kirkire, da ci gaba mai tsari, yana mai cewa NNPC Ltd na ƙoƙarin zama kamfani Wanda Ake ji da ita a duniya wanda zai iya samar da riba mai ɗorewa tare da tallafa wa makomar Najeriya da Afirka.
