Daga Bashir Bello, Abuja.
Filin wasa na kasa Moshood Abiola da ke Abuja zai dauki dumi a ranar Lahadi, 30 ga Nuwamba, 2025, yayin da Kamfanin NNPC Limited zai kaddamar da gasar wasanninta ta 14, wadda ke nuna bajintar jiki, hadin kai da alfaharin kamfani. Wannan gasa mai taken “Energy In Motion: Compete, Connect & Celebrate” za ta gudana na tsawon mako guda, kuma tana matsayin shiri na musamman gabanin Gasar Wasannin Masana’antar Mai da Gas ta Najeriya (NOGIG) karo na 20 da za a gudanar a watan Fabrairu, 2026.
Yan wasa 450 daga sassa shida na kamfanin za su halarci gasar, lamarin da ke nuna kudirin NNPC Ltd wajen inganta lafiyar ma’aikata da bunkasa kwarewar aiki. Kungiyoyin da za su fafata za su wakilci manyan reshen kamfanin kamar haka:
Team Integrity (Port Harcourt/Benin), Team Excellence (Lagos/Warri), Team Sustainability (Abuja/Kaduna)
A cikin kwanaki bakwai, ma’aikatan za su fafata a wasanni 13 da suka hada da: kwallon kafa, kwallon kwando, kwallon raga, squash, scrabble, 8-ball pool, golf, tanis, tanis na tebur, badminton da kuma wasannin motsa jiki.
Za a kammala gasar a ranar Asabar, 6 ga Disamba, 2025.
Baya ga kyaututtuka da zumunci, gasar na da muhimmiyar manufa ta gano fitattun’yan wasa da za su wakilci NNPC Ltd a gasar NOGIG ta 2026, inda kamfanin ke fatan kare kambunsa na zakara wanda ya dade yana rike da shi. A gasar da ta gabata a shekarar 2024, NNPC Ltd ta yi fice inda ta lashe lambobin yabo 50: zinariya 20, azurfa 9 da tagulla 21, ta doke sauran kamfanonin mai na kasa da kasa (IOCs) da hukumomin da ke karkashin Ma’aikatar Albarkatun Man Fetur ta Tarayya.
Yayin da ake ci gaba da shirin kaddamar da gasar, idanu sun karkata ga NNPC Ltd ba kawai don shirya gasa mai kayatarwa ba, har ma don tabbatar da matsayin ta a matsayin gwarzon kamfani a fagen wasanni a bangaren makamashi na Najeriya.
