Daga Bashir Bello, Abuja
Kamfanin Seplat Energy Plc, Wanda ke haɗin gwiwa da NNPC Ltd kuma babban mai samar da iskar gas zuwa hanyar bututun NNPC Gas Infrastructure Company Limited (NGIC), ya sanar da cewa zai gudanar da gyaran yau da kullum a wuraren samar da iskar gas daga ranar 12 zuwa 15 ga Fabrairu, 2026.
Wannan sanarwar ta fito ne daga ofishin Andy Odeh, Babban Jami’in Hulɗa da Jama’a na NNPC Ltd, inda aka rabawa ’yan jarida a Abuja.
Kamfanin ya bayyana cewa wannan aikin gyara na cikin tsarin tsaro da ƙa’idojin kula da ingancin kayan aiki na masana’antu, domin tabbatar da ci gaba da amincewa, inganci, da kuma tsaro Wajen gudanar da muhimman ayyukan iskar gas.
A cewar sanarwar, jami’an kamfanin sun jaddada cewa irin wannan gyaran lokaci-lokaci yana da matuƙar muhimmanci wajen tabbatar da kyakkyawan aiki, ƙarfafa juriya a harkokin gudanarwa, da rage haɗarin matsalolin da ba a shirya ba.
A cikin kwanaki huɗu na aikin, za a rage samar da iskar gas zuwa hanyar bututun NGIC na ɗan lokaci. Masana sun nuna cewa wasu kamfanonin samar da wutar lantarki da ke dogara da wannan iskar gas na iya fuskantar ƙarancin iskar gas, wanda zai iya shafar matakin samar da wutar lantarki kaɗan.
NNPC Ltd da Seplat Energy sun tabbatar wa jama’a cewa suna aiki tare domin tabbatar da cewa gyaran zai gudana cikin tsaro kuma a kammala shi a kan lokaci.
A halin yanzu, NNPC Gas Marketing Limited (NGML) na tattaunawa da wasu masu samar da gas domin rage tasirin da hakan zai iya haifarwa da kuma tabbatar da daidaito a cikin hanyar sadarwa.
Bayan kammala aikin, ana sa ran cikakken samar da iskar gas zuwa tsarin NGIC zai dawo nan da nan, wanda zai ba da damar kamfanonin samar da wutar lantarki da abin ya shafa su koma aiki yadda ya saba. Za a ci gaba da bayar da sabbin bayanai idan ya zama dole.
