Daga Bashir Bello, Abuja
Kamfanin Matatar Man Fetur ya Ƙasa NNPCL ya samu kuɗaɗen shiga na ₦34.5 tiriliyan, duk da raguwar farashin ɗanyen mai a kasuwannin duniya da kuma raguwar yawan sayar da wasu kayayyakin man fetur.
Kamfanin NNPC ya bayyana cewa yawan haƙo ɗanyen mai da sauran nau’in man da ake samu tare da shi ya kai matsakaicin ganga miliyan 1.77 a kowace rana, wanda shi ne mafi girma cikin shekaru biyar.
Waɗannan bayanai na ƙunshe ne a cikin sanarwar manema labarai da Andy Odeh, Babban Jami’in Sadarwa na Kamfanin NNPC Limited ya sanyawa hannun kuma ya rabawa manema labarai a Abuja.
Haka kuma sanarwan ya tabbatar da cewa samar da iskar gas ya kai ƙafa biliyan 7.2 a kowace rana, matakin da ba a samu irinsa ba cikin shekaru uku.
Kamfanin ya kuma sanar da ƙarin kuɗin rabon hannun jari zuwa ₦5.8 tiriliyan, wanda ya ƙaru da kashi 35 cikin 100.
A ɓangaren ayyukan more rayuwa, kamfanin ya kammala aikin babban layin bututun iskar gas na Ajaokuta zuwa Kaduna zuwa Kano mai tsawon kilomita 623, tare da kammala aikin tsallakawa ta Kogin Neja.
Haka kuma, ya ƙaddamar da tashar auna iskar gas ta ANOH-OB3, yayin da aikin masana’antar sarrafa iskar gas ta ANOH ke gab da fara aiki.
Kamfanin ya kuma sayi manyan motocin dakon kaya 500 masu the amfani da iskar gas mai matsewa (CNG), tare da ɗaukar matakan gyara harkokin matatun mai.
A fannin ma’aikata, NNPC ya bayyana cewa ya ɗauki ma’aikata 1,023 masu cikakken aiki a shekarar 2025, ciki har da sama da waɗanda suka kammala karatu 1,000 da suka samu horo na shekara guda kafin fara aiki.
Kamfanin ya kuma bayyana cewa mata sun kai kashi 23 cikin 100 na shugabannin sa, idan aka kwatanta da matsakaicin kashi 17 cikin 100 a masana’antar mai da iskar gas.
A ɓangaren taimakon al’umma da muhalli kuwa, an gudanar da tiyatar ido ga mutane 6,028, tare da dasa bishiyoyi 80,000.
Babban Daraktan Gudanarwa na NNPC Limited, Injiniya Bashir Bayo Ojulari, ya bayyana cewa nasarorin shekarar 2025 sun nuna muhimmancin ingantaccen gudanarwa, ƙara yawan samar da mai da kuma saka hannun jari a ma’aikata da kayayyakin aiki.
Kamfanin ya kuma bayyana aniyarsa ta kai yawan haƙo ɗanyen mai ganga miliyan biyu a kowace rana nan da shekarar 2027, sannan ganga miliyan uku nan da shekarar 2030, tare da samar da ƙafar iskar gas biliyan 12 a kowace rana zuwa shekarar 2030.
NNPC ya kuma bayyana shirin tattara jarin dalar Amurka biliyan 60 a sassan hako mai, sarrafa iskar gas da rarraba kayayyakin man fetur nan da shekarar 2030.
