Daga Bashir Bello, Abuja.
Gwamnan Jihar Kano, Alhaji Abba Kabir Yusuf, ya taya Shugaba Bola Ahmed Tinubu murna bisa nasarar mika fom ɗin neman takarar shugaban ƙasa ga Hukumar Zaɓe Mai Zaman Kanta ta Ƙasa (INEC) a gaban zaɓen shugaban ƙasa na shekarar 2027.
Wannan na ƙunshe ne a cikin sanarwar da mai magana da yawun gwamnan, Sunusi Bature Dawakin Tofa, ya fitar a ranar Juma’a.
Gwamna Yusuf ya yi kira ga ‘yan Najeriya daga kowace jam’iyya, kabila da addini su goyi bayan neman shugaba Tinubu na zango na biyu domin ci gaba da ɗorewar cigaba, gyaran tattalin arziki da ci gaban ƙasa da ake samu a halin yanzu.
Gwamnan ya yi wannan kira jim kaɗan bayan mika fom ɗin neman takarar shugaban ƙasa ga Kwamitin Aiki na Ƙasa (NWC) na jam’iyyar All Progressives Congress (APC) a Ladi Kwali Hall na Abuja Continental Hotel.
Shugaba Tinubu ya samu wakilcin Mai Ba shi Shawara na Musamman kan Harkokin Siyasa, Rt. Hon. Ibrahim Kabir Masari, wanda ya gabatar da fom ɗin a madadin shugaban ƙasa.
Gwamna Yusuf ya bayyana mika fom ɗin a matsayin wani muhimmin mataki a tafiyar dimokuraɗiyyar Najeriya, inda ya nuna kwarin gwiwa cewa sabuwar amanar shugaba za ta ƙarfafa gyare-gyaren da ake yi tare da hanzarta ci gaban ƙasar.
Haka kuma ya yaba wa Mataimakin Shugaban Ƙasa Kashim Shettima da jagorancin jam’iyyar APC bisa jajircewarsu wajen ƙarfafa jam’iyyar da tabbatar da tsarin zaɓe mai zaman lafiya, gaskiya da sahihanci.
Gwamnan ya sake tabbatar da jajircewar Jihar Kano wajen goyon bayan manufofi da shirye-shiryen da ke ƙarfafa haɗin kan ƙasa, bunƙasar tattalin arziki da ci gaban da ya haɗa kowa don amfanin yan Najeriya baki ɗaya.
