.
Dags Bashir Bello, Abuja
Kamfanin Siminti na Dangote Cement Plc, Obajana ta gudanar da bikin Ranar Matasa ta Duniya tare da sabunta kudirinta na ci gaban matasa ta hanyar shirye-shiryen karfafa gwiwa, da kuma kara tasirin zamantakewa mai kyau.
A cikin sanarwar da sashen yada labarai na kamfanin ya fitar, an ce taron ya jawo fiye da mahalarta 100, ciki har da Sustainability Champions, daliban horo, masu koyon aiki, ‘yan NYSC da sauran baƙi.
Taron ya zama dandali ga matasa don nuna sabbin dabaru, musayar ilimi, da binciken hanyoyin magance matsalolin dorewa da kalubalen wurin aiki.
An gabatar da jawaban da suka shafi batutuwa kamar sake amfani da kayayyaki (recycling), dorewar muhalli, da kuma hanyoyin fasaha irin su amfani da drone wajen tabbatar da tsaro a wuraren hakar ma’adinai.
Shugaban sashen kula da ma’aikata, Mista Adeniyi Azeez, ya yaba da kirkira da kwazo na mahalarta, ya kuma karfafa matasa da su ci gaba da bunkasa kwarewarsu, rungumar kirkira, da amfani da damar da za ta taimaka wajen ci gaban sana’a da rayuwa.
Shugaban sashen zamantakewa, Mista Ademola Adeyemi, ya jaddada muhimmancin shiga matasa wajen gina makoma mai dorewa.
Ya bukace su da su kasance masu sha’awar tabbatar da dorewar ci gaban al’umma da jagoranci mai inganci, yana mai cewa,
“ra’ayoyin yau na iya zama mafita mai tasiri gobe.”
Shirin ya kunshi gabatar da sabbin dabaru, jawaban da suka shafi dorewa, wakoki, waƙoƙin baka, wasanni da zaman tattaunawa da suka dauki hankalin mahalarta.
An kuma nuna fim din takaitaccen tarihin ayyukan Ranar Matasa ta Duniya a baya, wanda ya kara karfafa mahalarta kan muhimmancin shiga matasa wajen kawo sauyi mai kyau.
Mahalarta sun bayyana taron a matsayin abin wahayi da tasiri, inda suka ce ya kara musu kwarin gwiwa, kwarewar magana a bainar jama’a, da kuma kudirin ci gaba da ayyukan dorewa a cikin al’ummominsu.
Sanarwar ta ce nasarar bikin Ranar Matasa ta Duniya 2026 ta nuna kudirin Dangote Cement Plc wajen karfafa matasa, kirkira da ci gaba mai dorewa.
An kara da cewa taron ya tabbatar da cewa idan aka samar wa matasa da dandali da karfafa gwiwa, za su iya kirkirar mafita masu amfani kuma su zama masu bayar da gudummawa wajen gina makoma mai dorewa.
