Masu ruwa da tsaki daga Hukumar Tsaro ta Masana’antu ta NNPC Ltd, IWSA, Kamfanin Bututu da Ma’ajiyar Mai na Najeriya, NPSC, Ofishin Mai Ba Shugaban Kasa Shawara Kan Tsaro, ONSA, Rundunar ‘Yan Sandan FCT, Sojojin Najeriya da sauran hukumomin tsaro, yayin da suke gudanar da ziyarar duba a wani bangare na bututun danyen mai na NPSC da aka lalata a garin Pai, cikin Karamar Hukumar Kwali ta Babban Birnin Tarayya, Abuja, ranar Talata.
Daga Bashir Bello, Abuja
Kamfanin Mai na Kasa, NNPC Limited, tare da manyan hukumomin tsaro a ranar Talata sun kara kaimi wajen yaki da barna ga kayayyakin makamashi, inda suka kai ziyarar duba wani bangare na bututun danyen mai da aka lalata a garin Pai, cikin Karamar Hukumar Kwali ta Babban Birnin Tarayya.
Ziyarar duba hadin gwiwa ta hada da Hukumar Tsaro ta Masana’antu ta NNPC, Kamfanin Bututu da Ma’ajiyar Mai na Najeriya, NPSC, Ofishin Mai Ba Shugaban Kasa Shawara Kan Tsaro, ONSA, ta bangaren Tawagar Masu Shigar Da Kara ta Musamman, SPT, Rundunar ‘Yan Sandan FCT, Sojojin Najeriya, da sauran masu ruwa da tsaki. Tawagar ta tantance barnar da aka yi wa muhimmin bututun NPSC, ta ci gaba da bincike, sannan ta karfafa shirin yaki da zagon kasa ga tattalin arziki.
Hakkan na kunshe ne a wata Sanarwa dauke da sa hannun Andy Odeh Babban jamin hulda da Jama’a na NNPC. Acewar Sanarwan, Ziyarar ta biyo bayan kama mutane uku da ake zargi da barnar bututu a kauyukan Piri da Pai, sakamakon wani samame na hadin gwiwa da Tawagar SPT ta ONSA, Rundunar ‘Yan Sandan FCT, da Hukumar Tsaro ta Masana’antu ta NNPC suka gudanar.
Jami’ai sun ce masu laifi da suka sha kayan aiki suna kwaikwayon “NNPC/Rundunar Gwamnatin Tarayya ta Kwato Bututun Da Aka Watsar” suna hada baki da wasu mutanen gari domin tono da satar bututun.
NPSC, wani reshe na NNPC, na da sama da kilomita 5,000 na bututun danyen mai da kayayyakin mai. Satar bututu ta karu tun daga 2024. A shekarar 2025 kadai, an bayar da rahoton lamura 19 inda aka sace kusan kilomita 9 na bututu a hanyar Enugu-Makurdi-Yola da kuma tsakanin Piri da Izom a hanyar bututun Warri–Kaduna.
Zuwa yanzu a 2026, an ruwaito lamura biyar a Piri-Kwali da Gwagwalada a bangaren bututun danyen mai na Warri–Kaduna, da kuma a Badanga a hanyar bututun Jos-Gombe.
Da yake jawabi a wurin, Babban Jami’in Gudanarwa na NNPC, Injiniya Bashir Bayo Ojulari, wanda Shugaban Sashen Hulda da Jama’a, Dahiru Sani-Gwarzo, ya wakilta, ya ce kama wadanda ake zargin “wani muhimmin mataki ne” na rugurguza manyan kungiyoyin masu laifi. “Wadanda aka kama kadan ne daga cikin babbar kungiya. Abin da muke mayar da hankali a kai shi ne gano manyan ‘yan damfara da masu daukar nauyinsu domin gurfanar da su,” in ji shi. “Baya ga asarar tattalin arziki, wadannan ayyuka na kawo cikas ga ci gaban kasa, tsaron makamashi da kwarin gwiwar masu zuba jari.”
Kwamishinan ‘Yan Sandan FCT, CP Ahmed Muhammed Sanusi, ya ce an kama wadanda ake zargin ne ta hanyar tattara bayanan sirri da sa ido sosai bayan samun rahoton kutse a wasu sassan bututun. Ya kara da cewa bincike ya riga ya samar da “hanyoyi masu amfani” game da masu daukar nauyi da masu karbar kayan da aka sace, yana mai jaddada cewa za a gurfanar da duk wanda ke da hannu.
Daraktan Tsaron Makamashi a ONSA, Mista Goodluck Ebele, ya yi kira ga ‘yan Najeriya da su taimaka wa jami’an tsaro da sahihan bayanai a kan lokaci domin hana barnar bututu da sauran zagon kasa ga tattalin arziki. Ya jaddada cewa wayewar kai da hadin kan jama’a na da matukar muhimmanci wajen kare dukiyar kasa.
Lt. Col. J.O. Ajongbo, wanda ya wakilci Sojojin Najeriya, ya sake jaddada aniyar sojoji na aiki tare da NNPC da sauran hukumomi domin kare kayayyakin mai da iskar gas a fadin kasar.
Mataimakin Shugaban Kwamitin Majalisar Wakilai kan Albarkatun Mai, Hon. Sesi Whingan, ya yi alkawarin ba da goyon bayan dokoki domin karfafa matakan hana barnar bututu ta hanyar inganta dokoki.
