Masana’antar Mai ta Dangote & Petrochemicals ta sake tabbatar da jajircewarta wajen daidaita kasuwa da kuma samar da man fetur (Premium Motor Spirit, PMS) ba tare da katsewa ba a duk fadin Najeriya.
A lokacin bukukuwan baya-bayan nan, masana’antar ta aiwatar da wani shirin tallafin farashi na wucin gadi domin rage wa ’yan Najeriya nauyin kashe-kashen gida a lokacin da ya yi yawa.
Wannan shi ne karo na biyu a jere da masana’antar ta ɗauki nauyin manyan kuɗaɗe don amfanin ƙasa, ciki har da tallafin jigilar kaya a shekarar 2024 da kuma rage farashi a shekarar 2025 domin sauƙaƙa wa jama’a da kuma kwantar da hankalin kasuwa.
Duk da wannan rage farashin, da dama daga cikin tashoshin mai ba su nuna sabon farashin a famfon ba, wanda hakan ya hana ’yan Najeriya amfana da saukin farashin.
Yanzu da bukukuwan sun ƙare, an sake daidaita farashin PMS zuwa matakin da zai dore, domin tallafawa daidaiton kasuwa na dogon lokaci da kuma sauƙin farashi. A karkashin wannan daidaiton, farashin PMS a matakin gantry shi ne N799 a kowace lita, yayin da tashoshin MRS ke sayarwa a N839 a kowace lita.
Babban Daraktan Masana’antar Mai ta Dangote, David Bird, ya bayyana cewa masana’antar tana ci gaba da samar da kusan lita miliyan 50 na PMS a kullum ga kasuwar cikin gida, tare da jigilar kaya da rarrabawa a duk fadin ƙasa suna tafiya yadda ya kamata.
