Ya Ce Kowace Karamar Hukuma Ta Cancanci Samun Damar Samar da Manyan Ma’aikatan Gwamnati
Daga Bashir Bello, Abuja
The to theGwamnan Jihar Katsina, Malam Dikko Umaru Radda, ya rantsar da sabbin Sakatarorin Dindindin guda hudu a ranar Laraba, inda ya sake jaddada kudirin gwamnatinsa na gina ma’aikatar gwamnati mai kwarewa, inganci da kuma tsarin daukaka ma’aikata bisa cancanta.
Sabbin Sakatarorin Dindindin din sun hada da Malam Abdu Usman, Dakta Sani Suleiman, Dakta Shamsuddeen Yahaya Suleiman da Dakta Hussaini Hamisu Yanduna.
Da yake jawabi jim kadan bayan rantsar da su a Fadar Gwamnatin Jihar Katsina, Gwamna Radda ya ce nadin ya nuna kudirin gwamnatinsa na ba wa masu kwarewa, jajircewa da nagarta lada, maimakon la’akari da alaka ta kashin kai.
Ya ce, “An gudanar da dukkan tsarin zaben ne bisa ka’idojin aikin gwamnati da aka tanada. Wadanda aka rantsar a yau sun samu mukamansu ne saboda cancanta, kwarewa, jajircewa da sadaukar da kai wajen aiki.”
Gwamna Radda ya taya sabbin Sakatarorin Dindindin murna, tare da yin kira gare su da su tabbatar sun cika amanar da aka dora musu ta hanyar gaskiya, rikon amana, kwarewa da kuma sadaukar da kai wajen yi wa al’ummar Jihar Katsina hidima.
Ya jaddada cewa rantsuwar aiki da suka yi ta kasance abin tunatarwa a kodayaushe game da nauyin da ke kansu ga gwamnati da al’ummar jihar.
Ya ce, “Rantsuwar aiki ba wani biki kawai ba ne. Alkawari ne na gaskiya, rikon amana da kuma yi wa jama’a hidima cikin aminci. Idan kuka yi aiki bisa wadannan ka’idoji, za ku yi nasara kuma ku bar abin koyi ga masu zuwa bayanku.”
Gwamnan ya kuma bayyana cewa an zabo sabbin Sakatarorin Dindindin din ne daga kananan hukumomi daban-daban na jihar, yana mai cewa hakan wani bangare ne na kokarin tabbatar da adalci da bai wa kowa dama a ma’aikatar gwamnatin jihar.
Sai dai ya nuna damuwarsa cewa akwai wasu kananan hukumomi da ba su samu damar samar da wadanda suka cancanta ba, saboda rashin jami’an da suka kai matakin mukami da ake bukata ko kuma wadanda ke da cancantar shiga tsarin tantancewar.
Ya ce, “Muna fatan kuma muna addu’ar cewa nan gaba kowace Karamar Hukuma a Jihar Katsina za ta samar da kwararrun jami’ai masu cancantar fafatawa da kuma zama Sakatarorin Dindindin.”
Yana sake jaddada manufofin gwamnatinsa na gyaran ma’aikatar gwamnati, Gwamna Radda ya ce ya zama wajibi a bai wa kowane ma’aikaci dama ta ci gaba bisa cancanta da irin aikin da yake yi.
Ya ce, “Burinmu shi ne gina ma’aikatar gwamnati inda kowa zai samu damar daukaka bisa cancanta, ba wai saboda wanda ya sani ba, ko inda ya fito, ko kuma dangantakar iyali. Cancanta, kwarewa, gaskiya da jajircewa su ne za su kasance a gaba a ko da yaushe.”
Gwamnan ya umurci sabbin Sakatarorin Dindindin da su tabbatar da adalci, gaskiya da bin ka’ida a Ma’aikatunsu, Hukumominsu da Cibiyoyinsu, musamman wajen daukar ma’aikata, karin girma da ci gaban sana’a.
Haka kuma ya bukaci Daraktoci da sauran manyan ma’aikatan gwamnati su dauki nauyin koyarwa da jagorantar matasa ma’aikata ta hanyar ba su shawarwari, mika ilimi da kuma kara musu kwarewa.
Ya ce, “Ina kira ga manyan ma’aikatan gwamnati da su ci gaba da jagorantar matasa ma’aikata tare da inganta kwarewarsu. Ta wannan hanyar ne za mu dore da sauye-sauyen da muke aiwatarwa tare da tabbatar da ci gaba mai dorewa a ma’aikatar gwamnati.”
Gwamna Radda ya bayyana kwarin gwiwarsa cewa sabbin Sakatarorin Dindindin za su kara karfafa sauye-sauyen da ake yi a ma’aikatar gwamnatin jihar tare
da inganta ayyukan gwamnati ga al’umma.
Ya kuma ce gwamnatinsa za ta ci gaba da karfafa cibiyoyin gwamnati, bunkasa kwarewa da kuma fadada amfani da fasahar zamani a Ma’aikatu, Hukumomi da Cibiyoyi domin ma’aikatar gwamnati ta fi biyan bukatun al’umma.
Sabbin Sakatarorin Dindindin da aka rantsar kwararru ne a fannoni daban-daban:
Malam Abdu Usman yana da Digiri na Biyu (Master’s Degree) a fannin Manufofin Jama’a da Gudanar da Mulki (Public Policy and Administration), kuma yana da fiye da shekaru talatin yana aiki a Ma’aikatar Gwamnatin Jihar Katsina.
Ya yi aiki a KSACDP/IFAD, KTARDA, Fadar Gwamnati, KATSACA, kwamitocin gwamnati da kuma Ofishin Sakataren Gwamnatin Jihar.
Dakta Sani Suleiman ya samu digirin MBBS daga Jami’ar Ahmadu Bello da ke Zariya, sannan kuma Fellow ne na West African College of Physicians. Ya yi aiki a Asibitin Koyarwa na ABUTH, manyan asibitocin jihar Katsina, Ma’aikatar Lafiya da Hukumar Gudanar da Ayyukan Asibitoci.
Dakta Shamsuddeen Yahaya Suleiman yana da digirin MBBS daga Jami’ar Ahmadu Bello, Digiri na Biyu (Master’s Degree) a fannin Tattalin Arzikin Lafiya (Health Economics) daga Jami’ar Bayero Kano, sannan yana da Digirin Digirgir (Ph.D.) a fannin Kiwon Lafiyar Jama’a.
Ya taba zama Babban Sakataren Hukumar Kula da Lafiya ta Farko ta Jihar Katsina, inda ya jagoranci sauye-sauye domin inganta ayyukan kiwon lafiya na matakin farko.
Dakta Hussaini Hamisu Yanduna yana da takardun kwarewa a fannonin Lafiyar Hakora, Lafiyar Al’umma da Kiwon Lafiyar Jama’a, ciki har da Digiri na Biyu (Master’s Degree) a Kiwon Lafiyar Jama’a. Ya yi aiki a manyan asibitoci da Hukumar Gudanar da Lafiya ta Farko.
Haka kuma ya taba zama Shugaban Kungiyar Kwadago ta Najeriya (NLC), Reshen Jihar Katsina, da kuma Kungiyar Hadin Gwiwar Ma’aikatan Bangaren Lafiya.
