NNPC Ltd da Dangote Group Sun Kulla Yarjejeniya Don Inganta Tsaron Makamashi don Bunƙasa Najeriya

Babban Shugaban Gudanarwa (GCEO) na kamfanin NNPC Ltd, Injiya Bashir Bayo Ojulari, ya yi jawabi yayin ziyarar gani da ido a rukunin matatun mai da sinadaran fetur na Dangote da ke Ibeju-Lekki, a Jihar Legas, a ranar Asabar.

Shugaban Kamfanin NNPC Limited, Injiniya Bashir Bayo Ojulari, ya jagoranci tawagar manyan jami’an kamfanin zuwa Kamfanin Mai da Sinadarai na Dangote da ke Ibeju-Lekki, Jihar Legas, domin tattaunawa mai muhimmanci da ta haifar da sabuwar yarjejeniya ta haɗin gwiwa tsakanin kamfanonin biyu.

Ziyarar ta haɗa da zagayen wuraren aiki, inda aka mayar da hankali kan ƙarfafa dangantakar kasuwanci da aiki tsakanin NNPC Limited da Dangote Refinery, tare da tabbatar da hangen nesa ɗaya na makomar makamashin Najeriya.

Karanta HakananPosts

KAMFANIN DANGOTE CEMENT YA KADDAMAR DA KATAFAREN ASIBITI A JIHAR KOGI

Gwamna Yusuf Ya Naɗa Garo a Matsayin Abokin Takararsa Domin Neman Zaben 2027

Gwamna Yusuf Ya Taya Shugaba Tinubu Murna Kan Mika Fom ɗin Neman Takarar INEC

Injiniya Ojulari ya yaba wa shugaban rukunin Dangote, Alhaji Aliko Dangote, bisa hangen nesan sa da jajircewarsa wajen kammala gagarumin aikin matatar mai mai iya tace ganga 650,000 a rana, wanda ya sanya Najeriya a matsayin cibiyar masana’antar mai a nahiyar Afirka.

Wannan bayani ya fito ne daga wata sanarwar manema labarai da Babban Jami’in Hulɗa da Jama’a na NNPC Ltd, Andy Odeh, ya fitar a Abuja, ranar 21 ga Fabrairu, 2026.

Yayin da yake magana kan haɗin gwiwar, Injiniya Ojulari ya bayyana yarjejeniyar a matsayin wacce za ta “buɗe sabbin damar haɗin kai a fannin kadarori, ababen more rayuwa, jari da kasuwanni. Hakan zai kuma ba da damar ganin dukkan mu’amalar kasuwanci tsakanin NNPC da Dangote.”

Ya ƙara da cewa akwai babbar dama ga kamfanonin biyu su faɗaɗa harkokinsu zuwa fannin hakar mai, kasuwanci, jigilar kaya, samar da iskar gas da sauran fannoni.

Injiniya Ojulari ya nuna godiya ga Shugaban Ƙasa Bola Ahmed Tinubu bisa jagorancin hangen nesa a fannin man fetur da iskar gas. Ya ce manufofin Shugaban Ƙasa na bayyanawa, sauye-sauyen da suka dace da masu zuba jari, da kuma jajircewar sa wajen sauya tsarin fannin, sun nuna tsantsar niyya ga masu zuba jari na cikin gida da na waje, tare da samar da yanayi mai kyau ga irin wannan haɗin gwiwar.

A cewar Shugaban Dangote Group, Alhaji Aliko Dangote, “’Yan Najeriya ne za su amfana da haɗin gwiwar Dangote Group da NNPC Ltd, domin haɗin kanmu zai samar da fa’idar tattalin arziki da ƙarin daraja a kasuwanni.”

Ziyarar ta ƙare da tabbatar da kudirin kamfanonin biyu na zurfafa haɗin kai wajen cimma manufofi na bai ɗaya, tabbatar da tsaron makamashi, haɓaka masana’antu da kuma samar da ƙima ga yan Najeriya.

NNPC Ltd a halin yanzu tana da kaso 7.25 cikin ɗari a Dangote Refinery. Wannan hannun jari ana ɗaukar shi a matsayin zuba jari mai muhimmanci da ya dace da burin NNPC Ltd na faɗaɗa harkokin kasuwancin man fetur da kuma jajircewar ta wajen samar da ƙarfin tace mai a cikin gida.