Daga Bashir Bello Majalisa Abuja
Majalisar Wakilai ta fara aiwatar da cikakken tsarin gyare-gyare domin farfado da bangaren wutar lantarki na kasa, da nufin samar da ingantaccen wutar lantarki da bunkasa tattalin arziki da rayuwar al’umma.
Shugaban Majalisar, Dr Abbas Tajuddeen, ne ya bayyana hakan yayin kaddamar da wani kwamitin wucin gadi da aka kafa domin bincikar yadda aka kashe kudade a bangaren wutar lantarki daga shekarar 2007 zuwa 2024.
Shugaban Wanda ya Samu wakilcin Hon. Mike Ataba, ya bayyana cewa kafa wannan kwamiti na daga cikin ajandar dokokin Majalisa ta 10, domin sa ido akan yadda ma’aikatun gwamnati da hukumomi ke gudanar da ayyukansu, da nufin inganta ayyuka da kara amincewar jama’a.
Dr Abbas Tajuddeen ya jaddada muhimmancin wutar lantarki ga rayuwar yau da kullum da ci gaban zamani.
” Najeriya dole ne ta cimma ci gaba mai dorewa ta hanyar samun wutar lantarki mai inganci ga masana’antu, makarantu, asibitoci da gidaje” Inji Hon. Abbas
Tun da farko, Shugaban Kwamitin Wucin Gadi kan Harkokin Wuta, Arc. Ibrahim Al- Mustapha Aliyu, ya bayyana cewa bangaren wutar lantarki na Najeriya ya samu gagarumin saka jari daga gwamnati da masu zaman kansu cikin shekaru ashirin da suka gabata amma duk da haka yana fuskantar kalubale masu tsanani.
Arc. Al-Mustapha ya tabbatar da cewa rikice-rikicen da ke tattare da bangaren ne suka sa Majalisar ta yanke shawarar gudanar da cikakken bincike domin tantance yadda aka aiwatar da manufofi, da kuma tantance tasirin ayyuka da shirye-shiryen da aka aiwatar a wannan
lokaci.
“Duk da cewa wasu Basu Samu zuwa ba, mun Basu kwanaki goma suzo suyi mana bayanin, Matsalar wuta ta dade tana addabar Najeriya” Inji Al-Mustapha.
“Duk Kasar da ba tada wutan lantarki babu maganar cigaba, wannan yasa Majalisar Wakilai karkashin Shugabancin Dr Abbas Tajudeen taga ya dace tayi abinda ya Kamata” Hon. Al-Mustapha yace.
Shugaban kwamitin ya jaddada muhimmancin wannan aiki da ke gabansu, inda ya sha alwashin yin aiki tare da dukkan masu ruwa da tsaki, ciki har da hukumomin gwamnati, kamfanoni masu zaman kansu, kungiyoyin farar hula da sauran’yan Najeriya masu kishin kasa, domin tabbatar da gaskiya da rikon amana.
Shima Hon. Abubakar Hassan Fulata cewa yayi Kwamitin majalisar tana da ikon gayyatar duk Masu Ruwa da tsaki a Harkokin wutan lantarki a kasarnan domin a magance matsalolin.
“Kuma duk Wanda aka gayyata baizo ba zamu Dauki matakai akansu domin muna da ikon bada izinin a kamo Mutum” Inji Fulata.
Kwamitin dai zata cigaba da zaman sauraron ba’asi daga sauran hukumomin da Basu zoba ranan laraba, ashirin da watan Nuwamba na wannan shekara Idan Allah ya kaimu.
