Rukunin Kamfanonin Dangote ya tabbatar da cewa faɗaɗa harkokinsa a fadin Najeriya da sauran Afirka zai samar da Ayyukan yi.
A yayin bikin Rana ta musamman “Special Day” da aka gudanar a bikin kasuwanci Nasarawa wato, Nasarawa Trade Fair a babban birnin jihar Lafia, Darakta na Yanki kuma Mai Baiwa Shugaban Kamfanin Shawara, Fatima Wali-Abdurrahman, ta bayyana cewa sabbin ayyuka da sabbin mukamai suna ƙirƙiruwa yayin da kamfanin ke faɗaɗa jarin sa da kuma ƙara girman ayyukansa a sassan kasuwancinsa.
Dangote Group shi ne na biyu mafi girma mai ɗaukar ma’aikata a Najeriya bayan Gwamnatin Tarayya.
Shugaban Rukunin Kamfanonin Dangote, Aliko Dangote, ya bayyana a makon da ya gabata a Legas cewa faɗaɗa Masana’antar Mai ta Dangote daga ganga 650,000 a rana zuwa ganga miliyan 1.4 na iya jawo ma’aikata ƙwararru har 95,000 a lokacin gina masana’antar.
Fatima Wali-Abdurrahman, wadda Hon. Shuaibu Abdullahi ya wakilta, ta ce Jihar Nasarawa ce ke ɗauke da babbar aikin “Backward Integration” na kamfanin a sashen sukari, wato Nasarawa Sugar Company Limited (NSCL).
Ta ƙara da cewa kammala aikin zai buɗe sabuwar damar aikin yi, tare da ƙara fa’idodi ga al’ummar Nasarawa da Najeriya baki ɗaya.
A cewar Darakta na Yanki, ana sa ran rukunin kamfanin zai samar da dubban ayyukan yi kai tsaye da na takaichacen lokaci daga faɗaɗa manyan harkokinsa da suka haɗa da: mai, takin zamani, siminti, noma, sukari da gishiri, da sauransu.
Game da hangen nesa na kamfanin na shekarar 2030, ta ce: “Hangen nesanmu shi ne mu sauya Najeriya da Afirka daga tattalin arzikin cinye kaya zuwa cibiyar samar da kaya.”
Ta ƙara da cewa: “Jihar Nasarawa tana da muhimmiyar matsayi a cikin tsare-tsaren jarinmu na dogon lokaci. Ita ce ke ɗauke da Nasarawa Sugar Company Limited (NSCL) a Tunga, wadda idan aka kammala, za ta kasance ɗaya daga cikin manyan jarin sukari a nahiyar Afirka.”
A baya, Darakta na Masana’antu da Jari a Ma’aikatar Kasuwanci, Masana’antu da Jari, Mrs Catherine Bako, ta ce Gwamnatin Jihar Nasarawa ƙarƙashin Gwamna Abdullahi Sule ta samar da yanayi mai sauƙaƙa wa masu zuba jari.
A cewarta, gwamnati ta sanya sauƙin yin kasuwanci a matsayin babban manufa.
Darakta na Kasuwanci a Ma’aikatar Kasuwanci, Masana’antu da Jari, Dr. Ahmed Agbo, ya shaida wa mahalarta taron a zaman tattaunawa na “Dangote Special Day” cewa jihar tana da albarkatun ma’adinai masu yawa da za su jawo hankalin masu zuba jari.
Mr. Agbo ya ce jihar tana son yin haɗin gwiwa da Rukunin Dangote wajen binciko albarkatun ma’adinai da kayan masana’antu.
Shugaban Ƙungiyar Ƙananan Masana’antu ta Najeriya (NASSI), Nidan Sambo Manasseh, ya ce: “Hangen Dangote 2030 yana kan faɗaɗa, girma da kuma dogaro da kai. A Nasarawa, muna bayar da yanayi mai sauƙi don tallafawa wannan hangen nesa, wurin da manyan masana’antu za su iya amfani da albarkatun kasa da kuma tushe na ƙananan masana’antu da ke tasowa. Wannan shi ne inda hangen nesa ke haɗuwa da dama.”
