Daga Bashir Bello, Abuja
Kamfanin Nigerian National Petroleum Company Limited (NNPC Ltd.) ta yaba wa Hukumar Yaƙi da Sha da Fataucin Miyagun Ƙwayoyi ta Ƙasa (NDLEA) bisa taka-tsantsan da ƙwarewar da ta nuna wajen cafke wata babbar mota da aka ruwaito cewa an samu kilogiram 2,145 na tabar wiwi (cannabis) a ɓoye cikin wani sashe na motar a Jihar Ondo.
Kamfanin NNPC Ltd. ta lura da rahotannin kafafen yaɗa labarai game da motar da aka cafke, wadda ke ɗauke da alamomin da ke da alaƙa da Kamfanin.
Wannan na ƙunshe ne cikin wata sanarwar manema labarai da Andy Odeh, Babban Jami’in Sadarwa na Kamfanin NNPCL, ya sanya wa hannu, sannan aka rabawa manema labarai a Abuja.
A cewar sanarwar, NNPCL ta fayyace cewa binciken farko ya nuna cewa motar mai lambar rajista MKA 960 XC ba mallakin NNPC Ltd. ba ce, kuma ba ta cikin motocin da Kamfanin ko wani daga cikin dillalansa da aka amince da su ke amfani da su a hukumance.
Ta ƙara da cewa tambarin da aka nuna a jikin motar bai yi daidai da tambarin NNPC Ltd. na yanzu na hukuma ba, sannan ba a samu motar a cikin bayanan kadarorin Kamfanin ba.
NNPC Ltd. tana kuma tattaunawa da Nigerian Association of Road Transport Owners (NARTO) domin samun ƙarin bayani da kuma gano dalilan da suka sa aka yi amfani da tsohon tambarin Kamfanin a jikin motar.
Har ilayau, Kamfanin NNPC Ltd. tana ɗaukar duk wani amfani da sunanta ko alamomin kamfaninta ba tare da izini ba da matuƙar muhimmanci, musamman idan irin wannan amfani yana da alaƙa da ayyukan da suka saba wa doka.
Kamfanin ya ƙara bayyana cewa yana ci gaba da ƙoƙarin kare mutuncin tambarinsa tare da tabbatar da cewa ba a yi amfani da sunansa, alamomin kasuwancinsa da sauran alamomin kamfaninsa ba bisa ƙa’ida.
NNPC Ltd. za ta ci gaba da ba NDLEA da sauran hukumomin tsaro da abin ya shafa cikakken haɗin kai, sannan tana goyon bayan gudanar da cikakken bincike domin gano dukkanin gaskiyar lamarin, ciki har da wanda ya mallaki motar da wanda ke sarrafa ta, da kuma yadda alamomin NNPC Ltd. suka kasance a jikin motar.
Bugu da ƙari, Kamfanin yana sake duba hanyoyin da yake amfani da su wajen kare tambarinsa da kuma sa ido kan kadarorinsa, kuma zai ɗauki matakan da suka dace, ciki har da ɗaukar matakin shari’a idan ya zama dole, a kan duk wani amfani da alamomin kamfaninsa ba tare da izini ba.
NNPC Ltd. ta ƙarfafa gwiwar jama’a da hukumomin da abin ya shafa da su tabbatar da mallakar ko alaƙar motocin da ake ikirarin na Kamfanin ne ta hanyoyin hukuma da suka dace.
Har ila yau, Kamfanin ya sake yaba wa NDLEA bisa taka-tsantsan da kuma ci gaba da ƙoƙarinta na yaƙi da safarar miyagun ƙwayoyi ba bisa ƙa’ida ba a Najeriya.
NNPC Ltd. tana ci gaba da ba da cikakken goyon baya ga binciken da ake gudanarwa, kuma za ta ci gaba da samar da duk wani haɗin kai da ake buƙata domin tabbatar da gaskiyar lamarin baki ɗaya.
