Daga Bashir Bello, Abuja
Kotun Daukaka Kara ta shiyyar Owerri ta tabbatar da cewa shugabancin Jam’iyyar Labour Party na ƙasa ne kawai, ƙarƙashin Sanata Nenadi Usman, ne zai iya ba da izinin shigar da kara a madadin jam’iyyar.
Wannan na cikin wata sanarwa da Sakataren Yada Labarai na Jam’iyyar Labour Party na ƙasa, Ken Asogwa, ya fitar a Abuja ranar Litinin. Ya ce hukuncin ranar 2 ga Yuli na Kotun Daukaka Kara, Shiyyar Owerri, a cikin karar lamba CA/OW/104/2026: Labour Party da 14 wasu da sauransu v. Hukumar Zabe Mai Zaman Kanta ta Jihar Abia da wasu 4` ya sake tabbatar da ikon shugabancin da Usman ke jagoranta na shigar da kara ko kare jam’iyya a kotu.
A cewarsa, an shigar da wannan daukaka ne saboda rigimar da ta taso kafin zabe bayan jam’iyyar ta gano cewa an shigar da daukaka kara a madadinta ba tare da sanin, amincewa ko izinin shugabancin ƙasa na halal ba.
Ya ce Mai Ba da Shawarar Shari’a na Jam’iyyar na ƙasa, Mrs Taiwo Ajayi, daga baya ta ba Mr C. Okoroafor umarni ta hanyar wasiƙa mai kwanan wata 22 ga Yuni, 2026, ya wakilci Labour Party ya dauki matakan da suka dace na janyewa daga karar.
Ya ƙara bayani cewa, da aka kawo karar a gaban kotun daukaka kara, lauyoyi biyu ne suka bayyana suna wakilcin Labour Party. Wannan ya sa kotun ta nemi hujjar rubutu da ke nuna cewa suna da hurumi na wakilcin jam’iyyar.
Jam’iyyar ta ce yayin da Mrs A. Oteh ta dogara da wasiƙa daga Mr Ceekay Igara wanda ya ce shi ne Mataimakin Shugaban Jam’iyya na Yankin Kudu maso Gabas, Okoroafor ya gabatar da wasiƙar izini da Mai Ba da Shawarar Shari’a ta ƙasa ta bayar a madadin shugabancin ƙasa na halal.
Kotun ta amince da izinin da aka bayar ta Ofishin Mai Ba da Shawar Shari’a na ƙasa a matsayin ingantaccen izini. Bayan haka Oteh ta janye halartar ta da kuma bayanin tsayawa da ta shigar a karar.
Daga bisani kotun ta yi watsi da daukakar karar kuma ta yanke hukuncin biyan Naira 100,000 na tara lauya da ya yi aiki bisa izinin Igara.
”Jam’iyyar ta dauki wannan hukunci a matsayin muhimmi, domin ya sake tabbatar da ka’idar doka da aka saba cewa shugabancin ƙasa na halal ne kawai, ta hannun jami’ansa masu izini, ke da hurumin doka na ɗaukan lauya da kuma shigarwa, karewa ko ci gaba da shari’a a madadin Labour Party.
”Haka kuma, wannan hukunci ya sake tabbatar da Sanata Nenadi Usman a matsayin shugaba ɗaya tilo na halal kuma sahihiyar jam’iyyar. Jam’iyyar ta kuma yi alkawarin ci gaba da nuna adawa ga yunƙurin mutanen da ba su da izini na yin aiki a madadinta.
”Labour Party ta sake jaddada cewa za ta ci gaba da kalubalantar kowane yunƙuri na mutanen da ba su da izini, ciki har da Julius Abure da Mr Ceekay Igara, na cewa su wakilai ne na Labour Party ko kuma su shigar, kare ko ci gaba da shari’a a madadinta ba tare da izini na doka ba,” in ji Asogwa.
A nasa martani ga hukuncin a ranar Litinin, Kakakin ƙungiyar Julius Abure ta jam’iyyar, Obiora Ifoh, ya ce ba su gamsu da hukuncin ba amma za su kalubalanci shi a Kotun Ƙoli.
Yayin da ya ce Abure zai bi umarnin kotun, Ifoh ya ce nan take za su tafi Kotun Ƙoli domin kalubalantar hukuncin.
Rigima kan shugabancin Labour Party ta kasance batun kararraki da dama a kotu sakamakon ikirarin ɓangarori biyu kan shugabancin jam’iyya na ƙasa, inda kwamitin zartarwa ƙarƙashin Nenadi ya lashe yawancin kararrakin.
