Daga Bashir Bello, Abuja
Kamfanin Man Fetur na Ƙasa (NNPC Ltd) ya bayyana cewa yana tattaunawa da abokan hulɗa masu ƙwarewa a harkar tace mai da sarrafa sinadarai domin samar da mafita mai dorewa da riba ga matatun mai na ƙasar.
Babban Daraktan Kamfanin, Injiniya Bashir Bayo Ojulari, ya bayyana haka a yayin tattaunawa a taron Nigeria International Energy Summit (NIES) 2026 da ake gudanarwa a Abuja, mai taken “Kare Makomar Makamashin Najeriya.”
Ojulari ya ce sabon tsarin kamfanin ya wuce batun kuɗi da kwangilar gine-gine, yana mai da hankali kan gina tsarin aiki na zamani da zai tabbatar da dorewa. “Domin farfado da matatun mai ana buƙatar abubuwa uku: kuɗi, kwangilar EPC mai ƙwarewa, da kuma ƙwarewar aiki na duniya. Wannan shi ne abin da muke mai da hankali a kai yanzu,” in ji shi.
Ya ƙara da cewa NNPC Ltd yanzu ta fi dacewa wajen samun riba da dorewar kasuwanci, sakamakon shirin sauyin da ake aiwatarwa domin kare makomar makamashin ƙasar.
Game da nasarorin da aka samu wajen rage satar man ƙasa da inganta hanyoyin bututun mai, Ojulari ya danganta hakan da haɗin gwiwa mai ƙarfi da kamfanonin sama da kuma matakan gwamnati a yankin Niger Delta.
Ya bayyana yadda amfani da na’urorin AI da tsaro ya taimaka wajen daidaita ayyuka da ƙara kwarin gwiwar masu zuba jari.
Ojulari ya kuma yi bayani kan sabon Gas Master Plan 2026 na NNPC Ltd, yana mai cewa tsari ne da aka gina bisa bukatun kwastomomi, wanda ya yi daidai da shirin gwamnatin tarayya na Decade of Gas. Ya jaddada cewa iskar gas na da muhimmanci wajen bunƙasa tattalin arziki, masana’antu, da sauyin makamashi.
Ya kuma yaba wa Shugaba Bola Ahmed Tinubu bisa ƙara masana a cikin kwamitin gudanarwa da shugabannin NNPC Ltd, yana mai cewa matakin ya ƙara ƙarfafa tsari na kasuwanci da gasa a matakin duniya. Ojulari ya ce haɗin ƙwarewar cikin gida da ta ƙasashen waje tare da ma’aikata masu fasaha ya sanya NNPC Ltd zama kamfani mai ƙarfi da zai yi alfahari ga duk masu ruwa da tsaki.
