Gwamnatin Jihar Neja ta bukaci Kamfanin Dangote da sauran masu zuba jari na ’yan kasuwa su shiga damar hako man fetur a yankin Bida.
Yayin jawabi a wani zama na tattaunawa a lokacin Ranar Musamman ta Kamfanin Dangote a bikin baje kolin kasuwanci na kasa da aka kammala a Minna, Kwamishinan Kasuwanci, Zuba Jari, Masana’antu da Ci gaban Sashen ’Yan Kasuwa, Hon. Aminu Suleiman Takuma, ya bayyana cewa jihar na amfani da tsarin zuba jari na “One-Stop-Shop” domin yin hadin gwiwa da masu zaman kansu wajen bude damar man fetur.
Ya bayyana cewa karkashin tsarin hadin gwiwar gwamnati da ’yan kasuwa, gwamnatin jihar za ta rike kaso kadan ne kawai a harkar.
Takuma ya yaba wa Kamfanin Dangote bisa kokarinsa na masana’antu, musamman gina mafi girman matatar mai guda daya a duniya. Ya sake jaddada cewa Jihar Neja a bude take ga kasuwanci kuma za ta ci gaba da aiwatar da manufofin da ke jawo hankalin masu zuba jari zuwa muhimman sassan tattalin arziki.
A nata jawabin, Fatima Wali Abdurrahman, Darakta na Yanki kuma Babbar Mai Ba da Shawara ga Aliko Dangote, ta bayyana Kamfanin Dangote a matsayin abokin hulɗa na dabi’a ga Jihar Neja, inda ta kawo misali da jarin da kamfanin ya yi a harkar sarrafa shinkafa a Wushishi.
Ta yaba wa Gwamna Mohammed Umaru Bago bisa fitar da manufofin da ke jan hankalin masu zuba jari don bunkasa tattalin arziki da ci gaban masana’antu. Ta kara da cewa Kamfanin Dangote zai ci gaba da zurfafa hadin gwiwa da gwamnatin jihar, tare da jaddada cewa shi ne babban mai daukar nauyin baje kolin kasuwanci.
Haka kuma, a taron tattaunawar sun halarci Kwamishinonin Tsaron Cikin Gida da Noma da Tsaron Abinci. Sarkin Minna ya samu wakilci daga Dr. Umar Bakai a taron Ranar Musamman ta kamfanin.
