Daga BAshir Bello, Abuja
Gwamnan Jihar Kano, Alhaji Abba Kabir Yusuf, ya amince da aiwatar da ƙarin girma ga ma’aikatan Hukumar Kula da Ilimin Firamare ta Jihar Kano (SUBEB) guda 18,984, waɗanda suka haɗa da malamai da sauran ma’aikatan hukumar, na watan Janairu da Yulin shekarar 2026.
Sanarwar da Darakta-Janar mai kula da Yaɗa Labarai da Hulɗa da Jama’a a Gidan Gwamnatin Kano, Sunusi Bature Dawakin Tofa, ya fitar a ranar 5 ga Oktoba, 2026, ta ce amincewar ta biyo bayan buƙatar da Shugaban Hukumar SUBEB, Yusuf Kabir, ya gabatar na neman a saki N235,116,339.09 domin aiwatar da ƙarin girman a dukkan Hukumomin Ilimin Ƙananan Hukumomi 44 na jihar.
A cikin wasiƙar da hukumar ta aike a ranar 2 ga Satumba, 2026, SUBEB ta ce ma’aikatan da abin ya shafa sun haɗa da malamai da sauran ma’aikatan da suka cancanci ƙarin girma, waɗanda aka kammala tantance matsayinsu da kuma lissafin sabon albashin da zai biyo bayan ƙarin girman na watan Janairu da Yuli 2026.
Hukumar ta bayyana cewa, aiwatar da ƙarin girma a kan lokaci na da muhimmanci wajen ƙara wa ma’aikata ƙarsashi da ƙwarin gwiwa, ba su damar samun cigaba a aikinsu, ƙara musu ƙwarewa da kuma inganta ayyukan ilimin bai-ɗaya.
SUBEB ta ce, tana daga cikin manyan hukumomin gwamnati a jihar, inda take da kusan ma’aikatan koyarwa da waɗanda ba na koyarwa ba 60,000 da ke aiki a faɗin Hukumomin Ilimin Ƙananan Hukumomi 44.
Hukumar ta ce, gwamnatin Gwamna Abba Yusuf ta tarar da ɗimbin bashin ƙarin girman ma’aikata, ciki har da wanda ya shafe shekaru bakwai da kuma wani bashin da ya kai shekara ɗaya da rabi.
A cewar hukumar, Gwamna Yusuf ya riga ya amince da aiwatar da waɗannan ƙarin girma da aka daɗe ana bibiya, lamarin da ya taimaka wajen ƙara wa ma’aikata ƙwarin gwiwa tare da dawo da amincewarsu da aikin gwamnati.
SUBEB ta ƙara da cewa matakin ya kuma nuna yadda gwamnatin jihar ke mayar da hankali kan jin daɗin ma’aikatan gwamnati.
Hukumar ta bayyana cewa ta kammala dukkan shirye-shiryen da suka wajaba domin aiwatar da ƙarin girman na Janairu da Yuli 2026, ciki har da tantance ma’aikatan da suka cancanta da kuma sake lissafin albashinsu bisa sabon matsayinsu.
Sanarwar ta ce, Majalisar Zartarwa ta Jihar Kano ta amince da buƙatar a wani taronta na baya-bayan nan, lamarin da ya buɗe hanya ga sakin N235,116,339.09 da aka ware domin aiwatar da ƙarin girman ma’aikatan.
