Daga Bashir Bello, Abuja
Gwamnan Jihar Kano, Alhaji Abba Kabir Yusuf, ya bayyana hukuncin naɗa mataimakinsa, Mai Girma Murtala Sule Galadima Garo, a matsayin abokin takararsa domin zaben gwamna na shekarar 2027.
Wannan sanarwar ta fito ne daga bakin mai magana da yawun gwamnan, Sunusi Bature Dawakin Tofa, a ranar Litinin.
Gwamna Yusuf ya yi wannan sanarwa ne yayin wani taron dabarun siyasa tare da manyan jami’an gwamnatin tarayya na shugaban ƙasa Bola Ahmed Tinubu a gidan gwamnati na Kano da ke Abuja.
Gwamnan ya ce wannan hukunci ya biyo bayan jajircewar Garo, kishinsa, da kuma ƙwazon da ya nuna wajen ci gaban Jihar Kano tun bayan da ya hau kujerar mataimakin gwamna.
Ya bayyana gamsuwarsa da kyakkyawar alaƙar aiki tsakaninsu, inda ya jaddada cewa Garo ya nuna ƙwarewa, jajircewa, da kuma ɗaukar nauyin aiki da cikakken alhakin.
“Ina da cikakken kwarin gwiwa a gare shi. Ban yi nadama ba wajen zaɓar Garo a matsayin mataimakina a cikin ‘yan watannin da suka gabata, domin ya tabbatar da cewa shi ne zaɓi mafi dacewa,” in ji Gwamna Yusuf.
Gwamnan ya kuma jaddada amincewarsa da mataimakin gwamna, yana bayyana shi a matsayin abokin dogaro wanda gudummawarsa ta ƙarfafa ƙoƙarin gwamnatin wajen kawo ci gaba mai ma’ana a fadin Jihar Kano.
Ya yi kira ga shugabannin jam’iyya, jami’an gwamnati, da magoya baya su ci gaba da kasancewa ɗaya da jajircewa yayin da gwamnati ke ƙara tabbatar da nasarorin da ta cimma tare da shirin fuskantar babban zaben 2027.
