Daga; BASHIR BELLO, Abuja.
KAMFANIN Mai na Ƙasa ta Najeriya (NNPC Ltd.) ta yi maraba da rattaba hannu da Gwamnatin Tarayya ta yi kan Umarni na Tallafin Ayyukan Rijiyoyin Mai da Gas na cikin Teku, inda ta bayyana shi a matsayin sauyi na tarihi da zai ƙara inganta gasa ta Najeriya wajen jawo zuba jari a harkar Mai na cikin Teku mai zurfi wato Deep Offshore da kuma ƙarfafa hanyar ƙasar wajen cimma burin samar da gangan Mai miliyan uku a kowace rana (MMbopd) kafin shekarar 2030.
A cewar sanarwar da Babban Jami’in Hulɗa da Jama’a na NNPC Ltd., Andy Odeh, ya sanyawa hannu kuma aka rabawa ’yan Jarida a Abuja ranar Alhamis, sabon Umarni ya kafa tsarin kuɗi mai gaskiya, tabbatacce kuma mai bayar da damar gasa a duniya ga sabbin ayyukan rijiyar mai zurfi.
Ya samar da tabbacin da ake buƙata don buɗe babban jarin dogon lokaci, hanzarta yanke shawarar ƙarshe na zuba jari (FID), da kuma ƙara darajar albarkatun ramin mai na Najeriya.
Tsarin ya ƙarfafa matsayin Najeriya a matsayin ɗaya daga cikin wuraren da duniya ke sha’awar zuba jari a Rijiyar Mai da Gas, kuma ana sa ran zai buɗe hanyar samun dala biliyan 50 na sabbin jarin, ciki har da manyan ayyuka na Rijiyar Bonga South-West wanda aka amince da shi a watan Maris 2026, da Zabazaba da Rijiyar Mai ta Tekun Owowo.
Ana sa ran Bonga South-West zai kasance FID na farko a kan kadarar ramin Mai ta Najeriya tun daga 2008.
Da yake magana kan ci gaban, Babban Daraktan Kamfanin NNPC Ltd., Injiniya Bashir Bayo Ojulari, ya bayyana Umarnin a matsayin ɗaya daga cikin muhimman manufofi da aka aiwatar a sashen a cikin ’yan shekarun nan.
Ya ce: “Wannan sauyi ne mai juyin juya hali da ke aika saƙo mai ƙarfi ga masu zuba jari na duniya cewa Najeriya ta kuduri aniyar samar da yanayi mai tabbas, mai gasa da kuma yanayi na hulda mai kyau wajen zuba jari a harkar Rijiyar Mai na cikin Teku mai zurfi.
Tabbacin samar da kuɗi muhimmin abin ne da ke nuna shawarar zuba jari, kuma wannan tsarin ya samar da ƙarin haske da masana’antu ke nema tsawon lokaci.
Ya ce “ga NNPC Ltd., Umarni ya yi daidai da dabarunmu na kare tushen samarwa da muke da shi, hanzarta haɓakar gajeren lokaci, da kuma jawo sabbin jarin a kadarorin da ke da daraja.
“Yana ƙarfafa amincewarmu wajen cimma burin samar da gangan Mai miliyan 3 a kowace rana tare da ƙirƙirar ƙarin daraja ga masu hannun jari da tattalin arzikin Najeriya.
”Ojulari ya lura cewa sauye-sauyen da aka yi kwanan nan a sashen mai sun riga sun motsa fiye da dala biliyan 34 na sabbin alkawuran jarin.
Ana sa ran Umarni na Tallafin Ramin Mai Zurfi zai ginu kan wannan ci gaba ta hanyar ba da damar yanke FID a kan muhimman ayyukan ramin mai.
Babban Daraktan ya gode wa Shugaban Ƙasa Bola Ahmed Tinubu, GCFR, bisa jagoranci mai ƙarfi da jajircewa wajen samar da yanayi mai sauƙi ga zuba jari da ci gaba mai dorewa a sashen makamashin Najeriya ta hanyar jerin Umarni na Shugaban Ƙasa da suka ƙarfafa sashen harkar Mai da Gas na ƙasa.
Wannan nasara ta ƙara tabbatar da jajircewar NNPC Ltd. wajen haɓaka samarwa mai dorewa, jawo jarin da ya dace, ƙarfafa tsaron makamashin Najeriya da kuma samar da darajar dogon lokaci ga Ƙasa.
