Ɗan takar Sanata na Jam’iyyar All Progressives Congress (APC) mai fafutuka daga Bauchi ta Kudu, Brigadier Janar Abubakar Sulaiman Mai Kano (Mai Ritaya), ya yaba wa shugabancin jam’iyyar bisa samar da yanayi mai kyau ga ‘yan takara su shiga zaɓen fidda gwani mai zuwa.
Brig. Janar Sulaiman Mai Kano (Mai Ritaya) ya bayyana godiyarsa ne yayin da yake zantawa da manema labarai jim kaɗan bayan ya kammala tantancewa cikin nasara a hannun kwamitin tantancewa a Abuja.
Tsohon babban jami’in sojan, ya bayyana aikin tantancewa a matsayin nasara, yana mai cewa jam’iyyar ta cancanci yabo bisa baiwa dukkan ‘yan takara damar siya da mika fom ɗinsu kafin su gabatar da kansu a gaban kwamitin tantancewa.
Ya jaddada muhimmancin haɗin kai tsakanin mambobi da ‘yan takar APC, yana mai cewa ana buƙatar haɗin kai domin tabbatar da jam’iyyar ta samu galaba mai girma a zaɓen 2027.
Mai Kano ya ƙara yin kira ga ‘yan takara da masu ruwa da tsaki da su karɓi sakamakon zaɓen fidda gwani.
