Daga Bashir Bello, Abuja
Kasashen mambobin ECOWAS sun rattaba hannu kan yarjejeniya ta tarihi domin hanzarta aikin bututun gas na Atlantic na Afirka mai darajar dala biliyan 30.
Wannan yarjejeniya ta gudana ne a taron shugabannin kasashen ECOWAS da aka yi a garin Freetown, Sierra Leone.
Aikin AAGP babban gini ne na yankin da zai taimaka wajen amfani da albarkatun gas na Afirka ta Yamma, haɗa su da cibiyoyin bukata, da kuma ƙirƙirar hanyar ci gaba daga Afirka ta Yamma zuwa Sahel, Morocco da Turai.
A wata sanarwar da Andy Odeh, jami’in hulɗa da jama’a na NNPCL ya fitar ta bayyana cewa aikin zai samar da sama da biliyan 30 na cubic metres na gas a duk shekara.
Aikin ya samu goyon bayan Najeriya, Morocco, kasashen ECOWAS da Mauritania, kuma zai ratsa tsawon kilomita 6,900 a gabar tekun Atlantic.
Aikin yana karkashin jagorancin NNPC Ltd da ofishin ONHYM na Morocco. Manufar shi ne ƙarfafa samun wutar lantarki, inganta masana’antu, da kuma zurfafa haɗin kai a nahiyar Afirka.
Bugu da Kari, Rattaba hannun da aka yi yanzu ya tabbatar da amincewar da aka bayar a taron ECOWAS na Abuja a watan Disamba 2024, bayan yarjejeniyar fahimtar juna da aka kulla tsakanin Najeriya da Morocco a 2022.
Za a ci gaba da kammala tsarin tare da Morocco da Mauritania.
Aikin ya samo asali daga hangen nesa na tsohon shugaban Najeriya Muhammadu Buhari da Sarki Mohammed VI na Morocco, kuma yanzu yana samun cikakken goyon bayan Shugaba Bola Ahmed Tinubu. Bututun zai ratsa daga Najeriya zuwa Morocco ta cikin kasashe 13 na gabar tekun Atlantic, tare da haɗin kai zuwa kasashen Sahel.
Ana sa ran aikin zai ƙara samar da gas a yankin, ya tallafa wajen samar da wutar lantarki, ya haɓaka masana’antu, da kuma samar da ayyukan yi masu dorewa. NNPC da ONHYM sun tabbatar da jajircewarsu wajen aiwatar da aikin bisa ka’idojin inganci, kula da muhalli da kuma kyakkyawan Shugabanci
