Daga Bashir Bello, Abuja
Shugabannin ‘yan kasuwa da manyan jami’an kafafen yaɗa labarai a Jihar Kano sun yaba wa Gidauniyar Aliko Dangote (ADF) bisa irin ayyukan da ta gudanar a jihar, waɗanda suka bayyana da cewa suna da “gagarumin tasiri mai muhimmanci”.
Wannan yabo na zuwa ne a daidai lokacin da Gidauniyar da Gwamnatin Jihar Kano suka rattaba hannu kan yarjejeniyar fahimtar juna (MoU) kan kula da Cibiyar Koyar da Sana’o’i ta Aliko Dangote.
A cewar Gwamnatin Jihar Kano, ADF za ta karɓi ragamar kula da Cibiyar Koyar da Sana’o’i ta Aliko Dangote na wasu shekaru.
Haka kuma, an kammala gina babbar Cibiyar Koyar da Sana’o’i ta Aliko Dangote da aka kashe miliyoyin naira wajen ginawa a Ganaja, Jihar Kogi, kuma an shirya ƙaddamar da ita.
Da yake mayar da martani, Shugaban Ƙungiyar Masu Kera Kayayyaki ta Najeriya (MAN), Reshen Kano-Jigawa, Muhammad Bello Isyaku Umar, ya ce koyar da sana’o’i na daga cikin hanyoyin da suka fi tasiri wajen magance matsalar rashin aikin yi tsakanin matasa a Najeriya.
“Shirye-shirye irin su Cibiyar Koyar da Sana’o’i ta Aliko Dangote na iya samar wa matasa dabaru da ƙwarewar aiki waɗanda za su ba su damar zama ‘yan kasuwa, masu sana’o’in hannu ko kuma ma’aikata. Ya kamata a ƙara mayar da hankali kan ƙwarewar zamani ta fannin fasaha, na’urorin zamani da masana’antu” Ya ce.
Ya bayyana cewa Kano na ci gaba da kasancewa cibiyar tattalin arziki da kasuwanci ta arewacin Najeriya.
Shugaban Ƙungiyar MAN ya ce gaba ɗaya tasirin ayyukan ADF a Kano da arewacin Najeriya yana da matuƙar girma, ya watsu sosai kuma yana da tasiri mai ɗorewa.
Ya ƙara da cewa: “Tasirin ya kasance mai muhimmanci kuma ya shafi fannoni daban-daban. Daga kiwon lafiya da ilimi zuwa ƙarfafa mata, samar da ruwa da rage talauci, Gidauniyar ta taɓa fannoni da dama na rayuwar al’umma.
Abin da ya fi cancanta a yaba mata shi ne yadda waɗannan ayyuka suke ƙara ƙarfafa shirye-shiryen gwamnati tare da magance buƙatun al’ummomin da suka fi fama da matsaloli kai tsaye.”
Ya ce MAN ma na daga cikin waɗanda suka amfana da tallafin Dangote Industries Limited (DIL) ta hanyar ɗaukar nauyin shirye-shiryenta a kowace shekara.
A cewarsa: “Muna matuƙar godiya ga Ƙungiyar Dangote bisa wannan kyakkyawar al’ada. Wannan yana nuna ƙaƙƙarfan jajircewa wajen bunƙasa masana’antun Najeriya da kuma Ƙungiyar Masu Kera Kayayyaki ta Najeriya.
Ga Ƙungiyar MAN Kano/Jigawa, wannan abu ne mai matuƙar muhimmanci domin yana ƙarfafa haɗin gwiwa tsakanin masu masana’antun cikin gida, gwamnati da manyan masu zuba jari a fannin masana’antu.
Haka kuma, yana aika saƙo mai ƙarfi ga sama da mambobi 1,000 da muke da su a Kano da Jigawa cewa ‘yan kasuwar Najeriya za su iya taimaka wa juna wajen gina tattalin arzikin masana’antu mai ƙarfi.”
A nasa Jawabin wani ƙwararren ma’aikacin kafafen yaɗa labarai kuma Manajan Daraktan Radio Kano, Abubakar Adamu, ya bayyana wannan tallafi da cewa yana daga cikin muhimman wuraren haɗin gwiwa da suka fi muhimmanci ga makomar Kano.
Ya ce: “Kano na da dimbin matasa, kuma jihar ba za ta iya magance rashin aikin yi kawai ta hanyar samar da karin ayyukan gwamnati na gargajiya ba. Matasan na buƙatar ƙwarewar da ta dace da ainihin buƙatun kasuwa.”
Ya ƙara da cewa: “Ɗaya daga cikin ƙarfafan abubuwan da suka bambanta tsarin Gidauniyar Aliko Dangote shi ne cewa ba ta takaita ayyukanta ga wani fanni guda ba. Shirye-shiryenta sun shafi kiwon lafiya, abinci mai gina jiki, ilimi, hanyoyin samun abin dogaro da kai, ƙarfafa mata da kuma bunƙasa al’umma.”
Ya ce tallafin da Ƙungiyar Dangote ta bai wa Radio Kano a lokacin bikin cika shekaru 80 da kafar yaɗa labaran ta yi ya ƙara wa bikin “mutunci da armashi, tare da nuna babban misali na yadda kamfani ke sauke nauyin da yake da shi ga al’umma.”
Mista Adamu ya ƙara da cewa: “Shigar da Gidauniyar Dangote cikin ayyukan Asibitin Kwararru na Murtala Muhammad ya nuna irin abin da ingantacciyar haɗin gwiwa tsakanin gwamnati da kamfanoni masu zaman kansu za ta iya cimmawa.
Wani muhimmin misali kuma shi ne Makarantar Kasuwanci ta Dangote da ke Jami’ar Bayero Kano.
“Ba da jimawa ba, ta ƙaddamar da wani shirin tallafa wa abinci na ƙasa baki ɗaya a Kano a shekarar 2025, wanda ya shafi tallafa wa ‘yan Najeriya miliyan ɗaya da ke cikin mawuyacin hali da kayan abinci.
An kuma ƙaddamar da Shirin Tallafin Ƙananan Jari na Dangote (Dangote Micro-Grant Programme) a Kano, daga bisani aka faɗaɗa shi zuwa sauran sassan ƙasar.”
