Daga Bashir Bello, Abuja
Kamfanin Man Fetur na Ƙasa (NNPC) Limited ya ƙaddamar da sabon nau’in man fetur mai suna Cawthorne a kasuwar duniya, wanda ke nuna mataki mai muhimmanci wajen ƙara samar da mai a Najeriya da kuma faɗaɗa hanyoyin fitar da shi zuwa ƙasashen waje.
A ranar Lahadi, 5 Afrilu, NNPC Ltd ta tabbatar da cewa an loda jakar farko mai ɗauke da ganga 950,000 na Cawthorne crude a kan jirgin ruwan MT Eburones, wanda ya tashi zuwa Netherlands. An fitar da man ta hanyar Cawthorne Floating Storage and Offloading (FSO) da ke bakin teku a Bonny, Jihar Rivers, domin ƙarfafa ingancin fitar da mai da kuma tabbatar da tsaron makamashi.
Hakkan na kunshe ne a wata Sanarwa dauke da sa hannun Andy Odeh Babban Jami’in Hulda da Jama’a na NNPC Limited.
A cewar Sanarwan, Cawthorne crude yana da API gravity na 36.4, wanda ya sanya shi cikin rukuni na light, sweet crude, makamancin Bonny Light, kuma ana daraja shi a kasuwar duniya saboda yawan mai da dizel da yake bayarwa.
Kaddamar da Cawthorne wani bangare ne na dabarar NNPC Ltd na ƙara darajar kadarorinta, ƙarfafa gasa a kasuwar duniya, da kuma tallafawa manufofin gwamnati na ƙara samar da ganga miliyan uku na mai a kowace rana da kuma gas biliyan 12 cubic feet a kowace rana kafin shekarar 2030.
Sabon nau’in man ya biyo bayan ƙarin Nembe da Utapate, wanda ke nuna tsarin da NNPC Ltd ta ɗauka na inganta samarwa da faɗaɗa kasuwanni.
Shugaban Kamfanin NNPC Ltd, Injiniya Bashir Bayo Ojulari, ya yaba da manufofin Shugaba Bola Ahmed Tinubu da kuma haɗin gwiwar abokan OML 18, Hukumar NUPRC, da sauran masu ruwa da tsaki wajen cimma wannan nasara.
“Wannan nasara tana nuna hanyar da muka ɗauka a NNPC Limited hanyar da ta ta’allaka kan aiwatarwa, haɗin gwiwa, da ƙirƙirar daraja,” in ji Ojulari. “Muna matsawa daga albarkatun da ke da yiwuwar samun riba zuwa albarkatun da ake cin gajiyarsu, domin tabbatar da cewa kowace kadara tana bayar da sakamakon kasuwanci mai auna daraja.”
Ya ƙara da cewa nasarar fitar da Cawthorne crude ba wani abu ne da ya keɓe ba, illa dai wani bangare na dabarar da aka tsara don ƙara samarwa, ƙarfafa matsayin Najeriya a kasuwar duniya, da kuma tabbatar da tsaron makamashi na dogon lokaci.
NNPC Ltd ta jaddada cewa za ta ci gaba da amfani da ƙirƙira, haɗin gwiwa, da tsari mai inganci wajen buɗe cikakkiyar darajar albarkatun man Najeriya tare da tabbatar da ci gaban tattalin arziki mai ɗorewa.
